അലിരാജ്പൂര്‍: കാമുകനോടൊപ്പം ഒളിച്ചോടിപ്പോയ പത്തൊമ്പതുകാരിയെ കുടുംബാംഗങ്ങള്‍ നഗ്നയാക്കി റോഡിലൂടെ നടത്തുകയും മര്‍ദ്ദിക്കുകയും ചെയ്തു. മധ്യപ്രദേശിലെ അലിരാജ്പൂരിലാണ് സംഭവം. ആദിവാസി സമുദായത്തില്‍പ്പെട്ട പെണ്‍കുട്ടി മറ്റൊരു ആദിവാസിവിഭാഗത്തല്‍പ്പെട്ട യുവാവുമായി പ്രണയത്തിലായിരുന്നു. റോഡിലൂടെ നടത്തിയ പെണ്‍കുട്ടിയെ കുടുംബാംഗങ്ങള്‍ വടികളുപയോഗിച്ച് അടിച്ചു. തന്നോട് കരുണ കാട്ടണമെന്ന് പെണ്‍കുട്ടി അപേക്ഷിക്കുന്നത് വീഡിയോയില്‍ കാണാം. ദൃശ്യങ്ങള്‍ സമൂഹമാധ്യമങ്ങളിലൂടെ പ്രചരിച്ചതോടെയാണ് സംഭവം പുറംലോകം അറിഞ്ഞത്. പെണ്‍കുട്ടിയോ ബന്ധുക്കളോ പരാതി നല്‍കാത്തതിനാല്‍ പൊലീസ് കേസ് രജിസ്റ്റര്‍ ചെയ്തിട്ടില്ല. സോഷ്യല്‍ മീഡിയയില്‍ പ്രചരിക്കുന്ന വീഡിയോയുടെ അടിസ്ഥാനത്തില്‍ പൊലീസ് അന്വേഷണം ആരംഭിച്ചിട്ടുണ്ട്. പെണ്‍കുട്ടിയും പിതാവും ഗ്രാമത്തില്‍ ഇല്ലാത്തതിനാല്‍ അവരുടെ മൊഴിയെടുക്കാന്‍ സാധിച്ചിട്ടില്ലെന്ന് പൊലീസ് അറിയിച്ചു. ഈവര്‍ഷം ജൂണില്‍ കമിതാക്കളായ യുവാവിനെയും യുവതിയെയും തൂണുകളില്‍ കെട്ടി പെണ്‍കുട്ടിയുടെ കുടുംബവും ഗ്രാമീണരും ആക്രമിച്ചിരുന്നു.