സനാതനമാണ് ഒരേയൊരു മതമെന്ന ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥിന്റെ പരാമര്‍ശത്തിന് പിന്നാലെ വിമര്‍ശനവുമായി കോണ്‍ഗ്രസ് നേതാവ് ഉദിത് രാജ്. സനാതനധര്‍മത്തിന്റെ പേര് പറഞ്ഞ് ബി.ജെ.പി ജനങ്ങളെ കബളിപ്പിക്കുകയാണെന്നും സനാതനമുണ്ടെങ്കില്‍എന്തുകൊണ്ടാണ് മനുഷ്യര്‍ക്കിടയില്‍ ഭിന്നിപ്പുണ്ടാകുന്നതെന്നും അദ്ദേഹം ചോദിച്ചു.
സനാതനം യഥാര്‍ത്ഥത്തില്‍ ഒന്നുമല്ല. സനാതനമുണ്ടെങ്കില്‍ അവിടെ മതമുണ്ട്. സനാതനത്തിന്റെ പേരില്‍ നമ്മളെ കബളിപ്പിച്ച് അവര്‍ വോട്ട് നേടുകയാണ്. ഇനി അവര്‍ക്കത് സാധിക്കില്ല.
എല്ലാവരും സനാതനികളാണെങ്കില്‍, പിന്നെ എന്താണ് ചിലര്‍ക്ക് മാത്രം ആനൂുകൂല്യങ്ങള്‍ ലഭിക്കുന്നതും ചിലര്‍ക്ക് ലഭിക്കാത്തതും? എല്ലാവരും സനാതനികളാണെങ്കില്‍ മനുഷ്യര്‍ക്കിടയില്‍ വേര്‍തിരിവ് ഉണ്ടാകുന്നത് എന്തുകൊണ്ടാണ്? സനാതനവും ജാതിയുമെല്ലാം ഒന്നുതന്നെയാണ്’- അദ്ദേഹം പറഞ്ഞു.
കഴിഞ്ഞ ദിവസം ഗോരഖ്‌നാഥ് ക്ഷേത്രത്തില്‍ വെച്ച് നടന്ന ചടങ്ങില്‍ സനാതനധര്‍മം മനുഷ്യത്വത്തിന്റെ മതമാണെന്നും അതിന് എതിരെയുള്ള അതിക്രമങ്ങള്‍ അംഗീകരിക്കില്ലെന്നും യോഗി ആദിത്യനാഥ് പറഞ്ഞിരുന്നു. സനാതനം മാത്രമാണ് മതം. ബാക്കിയുള്ളതെല്ലാം ആരാധനരീതിയാണെന്നും അദ്ദേഹം കൂട്ടിച്ചേര്‍ത്തു.