ഷൊര്‍ണൂര്‍: സംസ്ഥാന സര്‍ക്കാരിനെതിരെ പരിഹാസവുമായി മെറ്റല്‍ ഇന്‍ഡസ്ട്രീസ് ലിമിറ്റഡ് സിഎംഡി ജേക്കബ് തോമസ് ഐപിഎസ്. 101 വെട്ട് വെട്ടിയാലും വായ്ത്തല പോകാത്ത അരിവാളും കത്തിയും ഉണ്ടാക്കുമെന്നും മൂര്‍ച്ച കൂടിയാല്‍ പ്രശ്‌നമാകുമോ എന്നറിയില്ലെന്നും അദ്ദേഹം പരിഹസിച്ചു. മെറ്റല്‍ ഇന്‍ഡസ്ട്രീസ് ലിമിറ്റഡ് സിഎംഡിയായി ചുമതലയേറ്റശേഷം പ്രതികരിക്കുകയായിരുന്നു ജേക്കബ് തോമസ്.
വിജിലന്‍സ് ഡയറക്ടര്‍ പദവിക്ക് തുല്യമായി മെറ്റല്‍ ഇന്‍ഡസ്ട്രീസ് ഡയറക്ടര്‍ പദവി ഉയര്‍ത്തിയതിന് സര്‍ക്കാരിനോട് നന്ദിയുണ്ടെന്നും അദ്ദേഹം പറഞ്ഞു. താന്‍ ഇരുമ്പുണ്ടാക്കാന്‍ പഠിച്ചിട്ടില്ല. ഡിജിപി റാങ്കിലുള്ളയാള്‍ ഇടപെടേണ്ട ക്രമസമാധാന പ്രശ്‌നം ഇരുമ്പുണ്ടാക്കുന്നിടത്ത് ഉണ്ടോയെന്ന് തനിക്ക് അറിയില്ലെന്നും ജേക്കബ് തോമസ് പറഞ്ഞു.
കേന്ദ്ര അഡ്മിനിസ്‌ട്രേറ്റീവ് ട്രിബ്യൂണലിന്റെ ഉത്തരവിനെ തുടര്‍ന്നാണ് വീണ്ടും ജേക്കബ് തോമസിന് നിയമനം നല്‍കാന്‍ സര്‍ക്കാര്‍ തയ്യാറായത്. പോലീസിലെ കേഡര്‍ തസ്തികയില്‍ നിയമിക്കണമെന്ന് ജേക്കബ് തോമസ് ആവശ്യപ്പെട്ടെങ്കിലും വ്യവസായ വകുപ്പിന് കീഴിലുള്ള സ്റ്റീല്‍ ആന്റ് മെറ്റല്‍ ഇന്‍ഡസ്ട്രീസ് എംഡിയായി നിയമനം നല്‍കുകയായിരുന്നു.