മുന്‍ മാധ്യമപ്രവര്‍ത്തകനും കെ.പി.സി.സി ട്രഷററായി പ്രവര്‍ത്തിച്ചിരുന്ന പ്രതാപചന്ദ്രന് നായരുടെ മരണത്തില്‍ ദുരൂഹതയുണ്ടൊയെന്ന് ശംഖുമുഖം അസി. കമീഷ്ണര്‍ അന്വേഷിക്കും. നേതാക്കളുടെ മാനസിക പീഡനം മൂലമാണ് പ്രതാപചന്ദ്രന്റെ മരണമെന്ന് മക്കള്‍ മുഖ്യമന്ത്രിക്ക് നല്‍കിയ പരാതിയില്‍ ആരോപിച്ചിരുന്നു. പ്രതാപചന്ദ്രന് നായരുടെ മക്കള്‍ രംഗത്തുവന്നതോടെയാണ് പൊലീസ് അന്വേഷണത്തിന് ഉത്തരവിട്ടത്. മക്കളായ പ്രജിത്തും പ്രീതിയും ഡി.ജി.പിക്ക് നല്‍കിയ പരാതിയെ തുടര്‍ന്നാണ് ഇപ്പോള്‍ അന്വേഷണം തുടങ്ങിയത്.
അദ്ദേഹം കെപിസിസിയുടെ ഫണ്ട് കട്ട്മുടിക്കുകയാണെന്നുള്ള തരത്തിലുള്ള ആരോപണങ്ങള്‍ അദ്ദേഹത്തിനെതിരെ സാമൂഹ്യമാധ്യമങ്ങില്‍ വ്യാപകമായി പ്രചരിച്ചിരുന്നു. ഇത് മാനസികമായി പ്രതാപചന്ദ്രന് വളരെ അധികം ബിദ്ധിമുട്ടുകള്‍ ഉണ്ടാക്കിയിരുന്നു. ഇക്കാരണമാണ് അദ്ദേഹത്തെ മരണത്തിലേക്ക് നയിച്ചതെന്ന് പരാതിയില്‍ പറയുന്നുണ്ട്. ഈ ദുഷ്പ്രചാരണത്തിന് പിന്നിലുള്ളവരെന്ന് സംശയിക്കുന്ന കോഴിക്കോട് സ്വദേശികളായ നേതാക്കള്‍ക്ക് എതിരെ പൊലീസില്‍ പരാതി നല്‍കാന്‍ പ്രതാപചന്ദ്രന് മരിക്കുന്നതിന് മുന്‍പ് തീരുമാനിച്ചിരുന്നതായി മക്കള്‍ പറഞ്ഞു. ഇതിനായി തലസ്ഥാനത്തെ ഒരു വക്കീലിനെ ചുമതലപ്പെടുത്തിയിരുന്നു.