ലണ്ടന്‍: ഇംഗ്ലീഷ് പ്രീമിയര്‍ ലീഗ് ഫുട്‌ബോളിലിന്ന് കനപ്പെട്ട ലിവര്‍പൂള്‍-ടോട്ടനം വാര്‍. നോര്‍ത്ത് ലണ്ടനിലെ ടോട്ടനത്തിന്റെ ആസ്ഥാനത്താണ് തുല്യശക്തികളുടെ കിടിലനങ്കം. ഇതുള്‍പ്പെടെ എട്ട് മല്‍സരങ്ങളാണ് ഇന്ന് നടക്കുന്നത്. തപ്പിത്തടയുന്ന മാഞ്ചസ്റ്റര്‍ യുനൈറ്റഡ് തിരിച്ചുവരാനുള്ള ശ്രമത്തില്‍ സ്വന്തം വേദിയിലിന്ന് കൃസ്റ്റല്‍ പാലസിനെ നേരിടും. നിലവില്‍ പോയിന്റ് ടേബിളില്‍ അഞ്ചാമതുള്ള ആഴ്‌സനല്‍ എവേ അങ്കത്തില്‍ ഏ.എഫ്.സി ബോണ്‍മൗത്തുമായി കളിക്കും. ഇത് വരെ കളിച്ച എല്ലാ മല്‍സരങ്ങളിലും തകര്‍പ്പന്‍ വിജയം സ്വന്തമാക്കിയ സിറ്റിക്ക് മുന്നില്‍ ഇന്ന് വോള്‍വ്‌സാണ്. ലിവര്‍ ഇതിനകം കളിച്ച ആറ് മല്‍സരങ്ങളില്‍ അഞ്ചിലും വിജയിച്ചവരാണ്. ഒരു സമനിലയില്‍ കുരുങ്ങിയത് വഴി ആകെ സമ്പാദ്യം 16 പോയിന്റ. ടോട്ടനവും സീസണില്‍ തോറ്റിട്ടില്ല. കളിച്ച ആറ് മല്‍സരങ്ങളില്‍ നാലിലും ജയിച്ച ടീം രണ്ട് കളികളില്‍ സമനില വഴങ്ങി. പതിനാല് പോയിന്റാണ് അവരുടെ സമ്പാദ്യം.