കൊച്ചി: ലോക്‌സഭാ തെരഞ്ഞെടുപ്പില്‍ മത്സരിക്കില്ലെന്ന് ജേക്കബ് തോമസ്. ജേക്കബ് തോമസ് നല്‍കിയ രാജി കേന്ദ്ര സര്‍ക്കാര്‍ സ്വീകരിക്കാത്തതിനാലാണ് മത്സരിക്കാനുള്ള സാധ്യതകള്‍ അടഞ്ഞത്. ഏപ്രില്‍ നാലിനാണ് നാമനിര്‍ദേശ പത്രിക സമര്‍പ്പിക്കാനുള്ള അവസാന തീയതി. ചാലക്കുടിയില്‍ നിന്ന് ട്വന്റി ട്വന്റി മുന്നണിയുടെ സ്ഥാനാര്‍ഥിയായി മത്സരിക്കുമെന്നാണ് ജേക്കബ് തോമസ് നേരത്തെ അറിയിച്ചിരുന്നത്. ട്വന്റി ട്വന്റിയും ഇക്കാര്യം സ്ഥിരീകരിച്ചിരുന്നു.
ഇതുവരെയും ജേക്കബ് തോമസ് സമര്‍പ്പിച്ച രാജി സര്‍ക്കാര്‍ സ്വീകരിച്ചിട്ടില്ല. അതിനാല്‍, രാജി സ്വീകരിക്കാത്ത സാഹചര്യത്തില്‍ ജേക്കബ് തോമസിന് മത്സരിക്കാന്‍ സാധിക്കില്ല. ജേക്കബ് തോമസിന് പകരം മറ്റൊരു സ്ഥാനാര്‍ഥിയെ കണ്ടെത്താന്‍ പ്രായോഗിക ബുദ്ധിമുട്ടുണ്ടെന്നാണ് ട്വന്റി ട്വന്റി ഇപ്പോള്‍ അറിയിക്കുന്നത്. തിരഞ്ഞെടുപ്പില്‍ മത്സരിക്കാന്‍ വേണ്ടി ജേക്കബ് തോമസ് രാജി സമര്‍പ്പിച്ചിരുന്നു. സ്വയം വിരമിക്കാന്‍ അനുവദിക്കണമെന്നാവശ്യപ്പെട്ടാണ് ജേക്കബ് തോമസ് അപേക്ഷ നല്‍കിയത്. സ്വയം വിരമിക്കുന്നതിനായി ജേക്കബ് തോമസ് മാര്‍ച്ച് 22 നാണ് അപേക്ഷ നല്‍കിയത്. ചീഫ് സെക്രട്ടറിക്കും കേന്ദ്ര സര്‍ക്കാരിനും സ്വയം വിരമിക്കല്‍ അപേക്ഷ നല്‍കിയിട്ടുണ്ട്. 2017 ഡിസംബര്‍ 30 മുതല്‍ ജേക്കബ് തോമസ് സസ്‌പെന്‍ഷനിലായിരുന്നു. സസ്‌പെന്‍ഷന്‍ ഇപ്പോഴും തുടരുകയാണ്.