യുകെയില്‍ മലയാളി കുടുംബത്തില്‍ കൂട്ടക്കൊല. നോര്‍ത്താംപ്ടണ്‍ഷയറില്‍ മലയാളി നഴ്‌സും രണ്ട് മക്കളുമാണ് കൊല്ലപ്പെട്ടത്. കോട്ടയം വൈക്കം സ്വദേശിനി അഞ്ജു(40), മക്കളായ ജാന്‍വി (4), ജീവ(6) എന്നിവരാണ് താമസസ്ഥലത്ത് മരിച്ചനിലയില്‍ കണ്ടെത്തിയത്. സംഭവത്തില്‍ ഭര്‍ത്താവ് കണ്ണൂര്‍ പടിയൂര്‍ കൊമ്പന്‍പാറ സ്വദേശി സാജു(52)വിനെ പോലീസ് കസ്റ്റഡിയിലെടുത്തു.
സുഹൃത്തുക്കളും ബന്ധുക്കളും ഇവരെ ഫോണില്‍ ബന്ധപ്പെടാന്‍ ശ്രമിച്ചിരുന്നു. കിട്ടാതെ വന്നതോടെ സംശയം തോന്നുകയായിരുന്നു. തുടര്‍ന്ന് ഇവര്‍ വീട് വന്ന് പരിശോധിച്ചെങ്കിലും വീട് അകത്ത് നിന്ന് പൂട്ടിയ നിലയിലായിരുന്നു. ഇതോടെ ഇവര്‍ പൊലീസിനെ വിവരം അറിയിച്ചു. പൊലീസെത്തി വീട് തുറന്ന് പരിശോധിച്ചപ്പോഴാണ് മൂന്നുപേരെയും രക്തത്തില്‍ കുളിച്ച നിലയില്‍ കണ്ടെത്തിയത്.
സംഭവത്തിന് പിന്നാലെ സാജു സ്ഥലത്ത് നിന്ന് രക്ഷപ്പെട്ടതായും പൊലീസ് പിന്തുടര്‍ന്ന് പിടികൂടിയെന്നുമാണ് പുറത്തുവരുന്ന വിവരം.