കണ്ണൂര്‍:ഉത്സവപ്പറമ്ബില്‍ കോഴി ലേലം വീറും വാശിയും നിറഞ്ഞ് കത്തിക്കയറി. പൂവന്‍കോഴിക്ക് വില 34,000 രൂപ.നാലു കിലോ തൂക്കമുള്ള പൂവന്‍കോഴിയാണ് ലേലത്തില്‍ താരമായത്. ഉത്സവപ്പറമ്ബില്‍ നാടന്‍ പൂവന്‍കോഴിക്ക് ഭാഗ്യം തെളിഞ്ഞപ്പോള്‍ ഉത്സവ കമ്മിറ്റിക്കും കോളടിച്ചു. ഇരിട്ടിക്കടുത്ത് പെരുമ്ബറമ്ബ് പുതിയ ഭഗവതി ക്ഷേത്ര തിറയോടനുബന്ധിച്ച്‌ നടത്തിയ ലേലത്തിലാണ് പൂവന്‍കോഴിക്ക് 34,000 രൂപ വിലയുണ്ടായത്. പത്ത് രൂപക്കാണ് ആഘോഷ കമ്മിറ്റി കോഴിയെ ലേലം വിളിക്കാന്‍ തുടങ്ങിയത്.
ലേലത്തില്‍ പങ്കെടുത്തവര്‍ തമ്മില്‍ വീറും വാശിയും നിറഞ്ഞ് കണ്ടുനിന്നവരെയും പങ്കെടുത്തവരെയും ആവേശം കൊള്ളിച്ച്‌ ലേലം കത്തിക്കയറിയപ്പോഴാണ് ആയിരവും പതിനായിരവും കടന്ന് തുക ഇരട്ടിയായി കുതിച്ചുയര്‍ന്നത്. ഉയര്‍ന്ന വിലക്ക് മുന്‍വര്‍ഷങ്ങളിലും ലേലം നടന്നിട്ടുണ്ടെങ്കിലും 34,000 രൂപ ഒരു കോഴിക്ക് ലഭിക്കുന്നത് ഇതാദ്യമായിട്ടാണെന്ന് ഉത്സവാഘോഷ കമ്മിറ്റി ഭാരവാഹികള്‍ പറഞ്ഞു.