നേമം: യുവാവിന്റെ നാലുദിവസം പഴക്കമുള്ള മൃതദേഹം കണ്ടെടുത്തതുമായി ബന്ധപ്പെട്ട് ദുരൂഹത ആരോപിച്ച്‌ ബന്ധുക്കള്‍. മലയിന്‍കീഴ് അണപ്പാട് ജനാര്‍ദനത്തില്‍ ശരത്ചന്ദ്രകുമാറിന്റെ (47) മൃതദേഹം കൊരട്ടി ചാലക്കുടി പുഴയുടെ തീരത്താണ് കണ്ടെത്തിയത്. ഞായറാഴ്ച രാവിലെയാണ് മൃതദേഹം കണ്ടെത്തുന്നത്.
കോണ്‍ട്രാക്ടറായ ശരത്തിനെ ഇക്കഴിഞ്ഞ 28ാം തീയതി മുതല്‍ കാണാനില്ലായിരുന്നു. ബന്ധുക്കള്‍ മലയിന്‍കീഴ് പൊലീസ് സ്റ്റേഷനില്‍ പരാതി നല്‍കിയിരുന്നു. അന്വേഷണത്തില്‍ വഴുതക്കാട് ഭാഗത്ത് സ്കൂട്ടറില്‍ യുവാവ് പോകുന്നതിന്റെ സി.സി.ടി.വി ദൃശ്യങ്ങള്‍ ലഭിച്ചെങ്കിലും കൂടുതല്‍ വിവരങ്ങള്‍ ലഭ്യമായിരുന്നില്ല.യുവാവിന്റെ ആധാര്‍ കാര്‍ഡ് ലഭ്യമായതാണ് മൃതദേഹം തിരിച്ചറിയാന്‍ സഹായകമായത്. കൊരട്ടി പൊലീസ് ഇന്‍ക്വസ്റ്റ് നടത്തി മൃതദേഹം തൃശൂര്‍ മെഡിക്കല്‍ കോളജ് ആശുപത്രി മോര്‍ച്ചറിയിലേക്ക് മാറ്റിയിരുന്നു. ബന്ധുക്കള്‍ എത്തി മൃതദേഹം തിരിച്ചറിയുകയായിരുന്നു.