അണ്ണാ ഡി.എം.കെ പാര്‍ട്ടിയുടെ പണമിടപാടുകള്‍ക്ക് തടയിട്ട് തമിഴ്‌നാട് കാവല്‍ മുഖ്യമന്ത്രി ഒ.പനീര്‍സെല്‍വം. എ.ഡി.എം.കെ അക്കൗണ്ടുകളില്‍നിന്നു പണമിടപാടുകള്‍ അനുവദിക്കരുതെന്ന് പനീര്‍സെല്‍വം ബാങ്കുകള്‍ക്ക് നിര്‍ദ്ദേശം നല്‍കി. ഇതു സംബന്ധിച്ച് ബാങ്കുകള്‍ക്കു കത്തെഴുതിയിരിക്കുകയാണ് പനീര്‍സെല്‍വം. പാര്‍ട്ടി അക്കൗണ്ടുകളില്‍നിന്നും പണം പിന്‍വലിക്കാനുള്ള നീക്കങ്ങള്‍ അനുവദിക്കരുതെന്ന പനീര്‍സെല്‍വം കത്തില്‍ ആവശ്യപ്പെടുന്നു.
കഴിഞ്ഞ ദിവസം അണ്ണാ ഡി.എം.കെയുടെ ട്രഷറര്‍ സ്ഥാനത്തുനിന്ന് ഒ പനീര്‍സെല്‍വത്തെ നീക്കിയതായി ശശികല പ്രഖ്യാപിച്ചിരുന്നു. എന്നാല്‍ ഈ തീരുമാനം അംഗീകരിക്കാതെയാണ് ഒ.പി.എസ് ബാങ്കുകള്‍ക്കു കത്തെഴുതിയിരിക്കുന്നത്. കത്തില്‍ താന്‍ തന്നെയാണ് ഇപ്പോഴും പാര്‍ട്ടി ട്രഷററെന്നും തന്റെ അനുവാദമില്ലാതെ ഒരു ഇടപാടും അനുവദിക്കരുതെന്നും നിര്‍ദ്ദേശം നല്‍കുന്നുണ്ട്. ജയലളിതയുടെ മരണവുമായി ബന്ധപ്പെട്ടും ശശികലക്കെതിരെ ആഞ്ഞടിച്ചും പനീര്‍സെല്‍വം എത്തിയിരുന്നു. അതിന് പിന്നാലെയായിരുന്നു പനീര്‍സെല്‍വത്തെ പാര്‍ട്ടിയുടെ ട്രഷറര്‍ സ്ഥാനത്തുനിന്നും ശശികല മാറ്റിയത്. പകരം വനം മന്ത്രി ഡിണ്ടുഗല്‍ സി ശ്രീനിവാസനെ ട്രഷററായി നിയമിക്കുകയും ചെയ്തിരുന്നു.
രാഷ്ട്രീയ പ്രതിസന്ധി നിലനില്‍ക്കുന്ന തമിഴ്‌നാട്ടില്‍ തനിക്കു പിന്തുണ നല്‍കുന്ന എം.എല്‍.എമാരെ ശശികല രാഷ്ട്രപതിക്കു മുന്നില്‍ ഹാജരാക്കാനാണ് ശശികലയുടെ നീക്കം. അതിന്റെ ഭാഗമായി പിന്തുണയ്ക്കുന്ന എം.എല്‍.എമാരെ അജ്ഞാത കേന്ദ്രങ്ങളിലേക്കു മാറ്റിയിരിക്കുകയാണ് ശശികല. 131 എം.എല്‍.എ മാരാണ് ശശികലയെ പിന്തുണക്കുന്നത്.