ഇ പി ജയരാജനെതിരായ ആരോപണം ഡല്‍ഹിയില്‍ തുടരുന്ന സിപിഎം പോളിറ്റ് ബ്യൂറോ യോഗത്തില്‍ ഇന്ന് ഉയര്‍ന്നുവന്നേക്കും. ഇന്നലെ ആരംഭിച്ച യോഗത്തില്‍ ഈ വിഷയം ചര്‍ച്ചക്കെടുത്തിരുന്നില്ല. വിലക്കയറ്റം, സമരപരിപാടികള്‍ എന്നിവയാണ് ചര്‍ച്ച ചെയ്തത്.
അതേസമയം ഇന്ന് ഇ.പി വിഷയം ചര്‍ച്ചക്കെടുക്കുമെന്നാണ് വിവരം. ഇതുവരെ പിണറായി വിജയന്‍, എം.എ ബേബി, എം.വി ഗോവിന്ദന്‍ തുടങ്ങിയ നേതാക്കള്‍ വിഷയം ഉന്നയിച്ചിട്ടില്ല. മറ്റാരെങ്കിലും ഉന്നയിച്ചാല്‍ പറയാമെന്ന നിലപാടിലാണ് കേരള നേതാക്കള്‍.
ഇ പി ക്കെതിരായ പരാതി ഉന്നയിച്ചത് പി. ജയരാജനായതിനാല്‍ അത് സംസ്ഥാന കമ്മിറ്റിയാണ് പരിശോധിക്കേണ്ടത്. അതു കൊണ്ടു തന്നെ പി.ബിയില്‍ വിഷയം വരില്ലെന്നാണ് പാര്‍ട്ടി വൃത്തങ്ങള്‍ പറയുന്നത്. പരാതി മാധ്യമസൃഷ്ടിയാണെന്ന് ഗോവിന്ദന്‍ പറഞ്ഞത് രേഖാമൂലം കിട്ടാത്തതിനാലാണ്. ജനറല്‍ സെക്രട്ടറി സീതാറാം യെച്ചൂരി പക്ഷേ വിഷയം ചര്‍ച്ച ചെയ്യണമെന്ന അഭിപ്രായക്കാരനാണ്. അഴിമതിക്ക് ആന്ധ്രയിലെ രണ്ട് സംസ്ഥാന നേതാക്കളെ സി.പിഎം പുറത്താക്കിയത് അടുത്തിടെയാണ്.