കൊച്ചി: എറണാകുളത്ത് വിദ്യാഭ്യാസ സ്ഥാപനങ്ങള്‍ക്ക് ഇന്ന് അവധി പ്രഖ്യാപിക്കുന്നതിന് കാലതാമസം വരുത്തിയ ജില്ലാ കലക്ടര്‍ രേണു രാജിനെതിരെ ഹൈക്കോടതിയില്‍ ഹര്‍ജി. എറണാകുളം സ്വദേശി അഡ്വ.എം.ആര്‍ ധനിലാണ് ഹര്‍ജി സമര്‍പ്പിച്ചത്.
ജില്ലയില്‍ അവധി പ്രഖ്യാപിക്കാന്‍ വൈകിയത് വിദ്യാര്‍ത്ഥികള്‍ക്കും അധ്യാപകര്‍ക്കും രക്ഷിതാക്കള്‍ക്കുമിടയില്‍ കടുത്ത ആശയക്കുഴപ്പമുണ്ടാക്കിയിരുന്നു. രാവിലെ 8.25നാണ് ജില്ലയിലെ വിദ്യാഭ്യാസ സ്ഥാപനങ്ങള്‍ക്ക് ഇന്ന് അവധിയാണെന്ന് കലക്ടര്‍ പ്രഖ്യാപിച്ചത്. എന്നാല്‍ പലയിടങ്ങളിലും വിദ്യാര്‍ത്ഥികള്‍ ഇതിനോടകം സ്‌കൂളിലെത്തിയിരുന്നു.
പ്രാതല്‍ ഭക്ഷണം തയാറാവുകയും പല സ്‌കൂളുകളിലും ഉച്ചഭക്ഷണത്തിനുള്ള ഒരുക്കങ്ങള്‍ നടത്തുകയും ചെയ്തതിനുശേഷമാണ് കലക്ടര്‍ അവധി പ്രഖ്യാപിച്ചത്. വിദ്യാര്‍ത്ഥികള്‍ക്കായി ഒരുക്കിയ ഭക്ഷണം പിന്നീട് ദുരിതാശ്വാസ ക്യാമ്പുകളില്‍ എത്തിച്ചു നല്‍കുകയാണ് ചെയ്തത്.
സംഭവത്തില്‍ കലക്ടറോട് റിപ്പോര്‍ട്ട് തേടണമെന്ന് അഡ്വ.എം.ആര്‍ ധനില്‍ ഹര്‍ജിയില്‍ ആവശ്യപ്പെട്ടു. അവധി പ്രഖ്യാപനത്തിന് മാര്‍ഗരേഖകളടക്കം സംസ്ഥാനത്ത് കൊണ്ടുവരണമെന്നും ഉന്നയിച്ചിട്ടുണ്ട്.