വിദ്യാര്‍ഥിനികളുടെ സ്വകാര്യ ദൃശ്യങ്ങള്‍ സാമൂഹിക മാധ്യമങ്ങള്‍ വഴി പ്രചരിച്ചതിനെ തുടര്‍ന്ന് ചണ്ഡിഗഢ് സര്‍വകലാശാലക്ക് മുന്നില്‍ വ്യാപക പ്രതിഷേധം. ഹോസ്റ്റലിലെ പെണ്‍കുട്ടികളുടെ ദൃശ്യങ്ങള്‍ മറ്റൊരു പെണ്‍കുട്ടി പകര്‍ത്തി യുവാക്കള്‍ക്ക് അയച്ചുകൊടുക്കുകയായിരുന്നു. സംഭവവുമായി ബന്ധപ്പെട്ട് പ്രതിയായ പെണ്‍കുട്ടിയെ പൊലീസ് അറസ്റ്റ് ചെയ്തു.
ഒന്നാംവര്‍ഷ എംബിഎ വിദ്യാര്‍ത്ഥിയാണ് അറസ്റ്റിലായത്. ദൃശ്യങ്ങള്‍ പ്രചരിച്ചതോടെ ഒട്ടേറെ വിദ്യാര്‍ത്ഥികള്‍ ആത്മഹത്യ ഭീഷണിയുമായി രംഗത്തെത്തി. അന്‍പതോളം വിദ്യാര്‍ഥികളുടെ ശുചിമുറി ദൃശ്യങ്ങളാണ് സാമൂഹ്യ മാധ്യമങ്ങള്‍ വഴി പ്രചരിച്ചത്. വീഡിയോ എടുത്ത കുട്ടി ഇത് ഒരു യുവാവിന് അയച്ചുകൊടുക്കുകയായിരുന്നു.
വീഡിയോ കയ്യില്‍ കിട്ടിയ യുവാവ് സാമൂഹ്യ മാധ്യമങ്ങള്‍ വഴി വീഡിയോ പ്രചരിപ്പിച്ചു. എന്നാല്‍ ഇത്തരമൊരു പ്രകോപനത്തിലേക്ക് പെണ്‍കുട്ടിയെ നയിച്ച കാരണം വ്യക്തമല്ല. സംഭവത്തില്‍ പ്രതിഷേധം ശക്തമായിരിക്കുകയാണ്. സംഭവത്തില്‍ ഊര്‍ജിതമായ അന്വേഷണം ആരംഭിച്ചതായി പോലീസ് അറിയിക്കുന്നു.