ന്യൂഡല്‍ഹി: വിഖ്യാതമായ ജവഹര്‍ലാല്‍ നെഹ്‌റു യൂണിവേഴ്‌സിറ്റിയുടെ പേരു മാറ്റണമെന്ന ആവശ്യവുമായി ബിജെപി ദേശീയ ജനറല്‍ സെക്രട്ടറിയും മുന്‍ കര്‍ണാടക മന്ത്രിയുമായ സിടി രവി. സര്‍വകലാശാലയ്ക്ക് സ്വാമി വിവേകാനന്ദന്റെ പേരിടണം എന്നാണ് അദ്ദേഹത്തിന്റെ ആവശ്യം.
‘ ഭാരതം എന്ന ആശയത്തിനു വേണ്ടി നില കൊണ്ടയാളാണ് സ്വാമി വിവേകാനന്ദന്‍. അദ്ദേഹത്തിന്റെ തത്വശാസ്ത്രവും മൂല്യങ്ങളും ഭാരതത്തെ ശക്തിപ്പെടുത്തി. ജവഹര്‍ലാല്‍ നെഹ്‌റു യൂണിവേഴ്‌സിറ്റിക്ക് സ്വാമി വിവേകാനന്ദന്റെ പേരിടണം. ഭാരതത്തിലെ ദേശാഭിമാനിയായ സന്യാസിയുടെ ജീവിതം വരുംതലമുറകളെ പ്രചോദിപ്പിക്കും’ – അദ്ദേഹം ട്വീറ്റ് ചെയ്തു.
നാലു ദിവസം മുമ്പാണ് സര്‍വകലാശാലാ ക്യാംപസില്‍ നിര്‍മിച്ച വിവേകാനന്ദ പ്രതിമ പ്രധാനമന്ത്രി നരേന്ദ്രമോദി അനാച്ഛാദനം ചെയ്തിരുന്നത്.
ഇത് ആദ്യമായല്ല, ബിജെപി ജെഎന്‍യുവിന് എതിരെ രംഗത്തു വരുന്നത്. പല വേളയില്‍ സര്‍വകലാശാല ദേശവിരുദ്ധരുടെ താവളമാണ് ബിജെപി നേതാക്കള്‍ ആരോപിച്ചിരുന്നു. വിവാദ പ്രസ്താവനകള്‍ക്ക് പേരു കേട്ട നേതാവു കൂടിയാണ് സിടി രവി. ഈയിടെ ഇദ്ദേഹം കര്‍ണാടകയില്‍ ‘ലവ് ജിഹാദ്’ ക്രിമിനല്‍ കുറ്റമാക്കണം എന്നാവശ്യപ്പെട്ടിരുന്നു.