മോസ്‌കോ: റഷ്യന്‍ പ്രസിഡന്റ് വഌദിമിര്‍ പുടിനു നേരെ വധശ്രമം. പുടിന് സഞ്ചരിച്ച ലിമോസിന്‍ കാറിന്റെ ഇടതു മുന്‍ ചക്രം പൊട്ടിത്തെറിച്ചതായി ജനറല്‍ ജിവിആര്‍ ടെലഗ്രാം ചാനലിനെ ഉദ്ധരിച്ച് യൂറോ വീക്കിലി ന്യൂസ് റിപ്പോര്‍ട്ട് ചെയ്തു. ഫെബ്രുവരിയില്‍ യുക്രെയ്‌നു നേരെ യുദ്ധം പ്രഖ്യാപിച്ചതു മുതല്‍ പുടിന്റെ ആരോഗ്യസ്ഥിതിയെക്കുറിച്ചും വധഭീഷണികളെക്കുറിച്ചും അഭ്യൂഹങ്ങള്‍ ശക്തമായിരുന്നു.
അപകടത്തില്‍ പുടിന് പരിക്കേറ്റിട്ടില്ല. വാഹനത്തിന്റെ ചക്രം പൊട്ടിത്തെറിച്ചതിനു പിന്നാലെ മുന്‍വശത്ത് നിന്ന് പുക ഉയര്‍ന്നെങ്കിലും ഉടന്‍ സുരക്ഷാ നടപടികള്‍ സ്വീകരിച്ചതായി യൂറോ വീക്കിലി ന്യൂസ് റിപ്പോര്‍ട്ട് ചെയ്തു. സംഭവത്തില്‍ നിരവധി പേരെ അറസ്റ്റു ചെയ്തതായാണ് വിവരം.
മുമ്പും പുടിനു നേരെ നിരവധി തവണ വധശ്രമമുണ്ടായിട്ടുണ്ടെന്നാണ് വിവരം. അഞ്ചു വധശ്രമങ്ങളെ അതിജീവിച്ചതായി 2017ല്‍ പുടിന് തന്നെ പരസ്യമായി വ്യക്തമാക്കിയിരുന്നു.