ആലുവ: നവോത്ഥാന നായകനായ ആറാട്ടുപുഴ വേലായുധപ്പണിക്കരുടെ പേരിലുള്ള പ്രതിഭാ പുരസ്കാരത്തിന് ഡോ. എം.പി. അബ്ദുസ്സമദ് സമദാനി (മതസൗഹാർദ്ദം), കാനം രാജേന്ദ്രൻ (പൊതുപ്രവർത്തനം), സംവിധായകൻ വിനയൻ (കലാസാംസ്കാരികം), ഫാ. ഡേവിസ് ചിറമേൽ (ജീവകാരുണ്യ പ്രവർത്തനം) എന്നിവരെ തെരഞ്ഞെടുത്തു. സമൂഹത്തിന്റെ വിവിധ തുറകളിൽ മഹത്തായ സേവനം അർപ്പിച്ചവർക്ക് ഏർപ്പെടുത്തിയതാണ് പുരസ്കാരം. പത്തൊൻപതാം നൂറ്റാണ്ടിൽ സാമൂഹികമായ ഉച്ചനീചത്വങ്ങൾക്കെതിരെ ശക്തമായ പോരാട്ടം നയിച്ച് നവോത്ഥാനത്തിന് വഴിയൊരുക്കിയ വേലായുധപ്പണിക്കരുടെ പേരിലാണ് പുരസ്കാരം.
വേലായുധപ്പണിക്കർ അനുസ്മരണ ദിനത്തിൽ സാമൂഹിക മുന്നേറ്റ മുന്നണിയും ആലുവ അദ്വൈതാശ്രമവും സംയുക്തമായി നടത്തുന്ന അനുസ്മരണ സമ്മേളനത്തിൽ പുരസ്കാരദാനം നടത്തുമെന്ന് സ്വാമി ധർമ്മചൈതന്യ, കെ.പി. അനിൽദേവ്, ഡോ. ബി. അബ്ദുൽ സലാം, വി.ഡി. രാജൻ, കെ. രാജീവൻ, വിദ്യാപുഷ്പൻ, സിന്ധു ഷാജി എന്നിവർ അറിയിച്ചു.