ചെറുപ്പത്തില്‍ പിതാവ് ലൈംഗികമായി തന്നെ പീഡിപ്പിച്ചിട്ടുണ്ടെന്ന് ഡല്‍ഹി വനിത കമ്മീഷന്‍ അധ്യക്ഷ സ്വാതി മലിവാള്‍. വനിതാ കമ്മീഷന്‍ സംഘടിപ്പിച്ച ഒരു അവാര്‍ഡ്ദാന ചടങ്ങില്‍ പങ്കെടുത്തപ്പോഴായിരുന്നു സ്വാതി മലിവാള്‍ ഇക്കാര്യം പറഞ്ഞത്.
പിതാവ് വീട്ടില്‍ വരുമ്പോള്‍ തന്നെ തനിക്ക് ഭയമായിരുന്നു. പിതാവിനെ ഭയന്ന് കട്ടിലിനടിയില്‍ പലപ്പോഴും ഒളിച്ചിരുന്നിട്ടുണ്ട്. കുട്ടികളെ ലൈംഗിക പീഡനത്തിനിരയാക്കുന്ന പുരുഷന്‍മ്മാരെ പാഠം പഠിപ്പിക്കുകയാണ് തന്റെ ലക്ഷ്യമെന്നും സ്വാതി വ്യക്തമാക്കി.
പിതാവ് പലപ്പോഴും എന്റെ മുടിക്ക് കുത്തിപിടിച്ചിരുന്നു. ഇത് തനിക്ക് കടുത്ത വേദനയാണ് സമ്മാനിച്ചതെന്നും സ്വാതി പറഞ്ഞു. ഒരുപാട് വേദനകള്‍ അനുഭവിച്ച ഒരാള്‍ക്ക് മാത്രമെ മറ്റുള്ളവരുടെ ദുഃഖങ്ങള്‍ മനസിലാകുവെന്നും അവരുടെ നെഞ്ചിലെ തീ ഉറങ്ങിക്കിടക്കുന്ന മുഴുവന്‍ സംവിധാനങ്ങളെയും ഉണര്‍ത്തുമെന്നും അവര്‍ പറഞ്ഞു. നാലാം ക്ലാസ് വരെ പിതാവിനൊപ്പം താന്‍ താമസിച്ചിരുന്നു. ഇതിനിടയില്‍ പലതവണ പിതാവ് തന്നെ പീഡിപ്പിച്ചിരുന്നുവെന്നും സ്വാതി വ്യക്തമാക്കി.