കൊച്ചി: ശിവരാത്രി പ്രമാണിച്ച് ആലുവയില്‍ രണ്ട് ദിവസത്തേക്ക് മദ്യനിയന്ത്രണം ഏര്‍പ്പെടുത്തി ജില്ലാകലക്ടര്‍. നാളെ രാവിലെ ആറ് മണി മുതല്‍ ഞായറാഴ്ച ഉച്ചയ്ക്ക് രണ്ട് മണി വരെയാണ് നിയന്ത്രണം. മദ്യശാലകള്‍ തുറക്കരുതെന്നും ജില്ലാകലക്ടര്‍ അറിയിച്ചിച്ചിട്ടുണ്ട്.
ശനി, ഞായര്‍ ദിവസങ്ങളില്‍ കൊച്ചി മെട്രോ സര്‍വീസ് നീട്ടി. ക്രമസമാധാന പ്രശ്‌നങ്ങളോ അപകടങ്ങളോ ഇല്ലാതെ ശിവരാത്രിയുടെ ചടങ്ങുകള്‍ പൂര്‍ത്തീകരിക്കുന്നതിന് എല്ലാ ഭക്തജനങ്ങളും സഹകരിക്കണമെന്ന് കലക്ടര്‍ അഭ്യര്‍ത്ഥിച്ചു. ബലിതര്‍പ്പണം 18ന് രാത്രി വൈകി ആരംഭിച്ച് 19ന് ഉച്ചവരെ നീളും. കലക്ടര്‍ അറിയിച്ചു.
ഇക്കുറി ബലി തര്‍പ്പണത്തിന് തിരക്ക് കൂടാന്‍ സാധ്യതയുണ്ടെന്നാണ് വിലയിരുത്തല്‍. സുരക്ഷക്കായി ആയിരത്തിലധികം പൊലീസുകാരെ വിനിയോഗിച്ചു. കെഎസ്ആര്‍ടിസി 210 പ്രത്യേക സര്‍വ്വീസുകള്‍ നടത്തും. സ്വകാര്യ ബസുകള്‍ക്ക് സ്‌പെഷ്യല്‍ പെര്‍മിറ്റ് നല്‍കും. ആലുവയിലേക്ക് പ്രത്യേക ട്രെയിന്‍ സര്‍വീസുകളും ഏര്‍പ്പെടുത്തിയിട്ടുണ്ട്. കൊച്ചി മെട്രോ അധിക സര്‍വ്വീസ് നടത്തുവാനും തീരുമാനിച്ചിട്ടുണ്ട്.