ലോക്‌സഭാ തിരഞ്ഞെടുപ്പില്‍ 400ലധികം മണ്ഡലങ്ങളില്‍ വിജയം നേടുമെന്ന ബിജെപി പ്രഖ്യാപനത്തെ വെല്ലുവിളിച്ച് പശ്ചിമബംഗാള്‍ മുഖ്യമന്ത്രിയും തൃണമൂല്‍ കോണ്‍ഗ്രസ് നേതാവുമായ മമത ബാനര്‍ജി. 200 മണ്ഡലങ്ങളിലെങ്കിലും വിജയിച്ചുകാണിക്കാന്‍ അവര്‍ ബിജെപിയെ വെല്ലുവിളിച്ചു.
‘400ലധികം നേടുമെന്നാണ് ബിജെപി പറയുന്നത്. 200 സീറ്റെന്ന കടമ്പ മറികടക്കാന്‍ ഞാന്‍ അവരെ വെല്ലുവിളിക്കുകയാണ്. 2021ലെ നിയമസഭാ തിരഞ്ഞെടുപ്പില്‍ 200ലധികം ഇടങ്ങളില്‍ വിജയിക്കുമെന്നാണ് അവര്‍ പറഞ്ഞത്, പക്ഷേ 77 വരെയേ നേടാനായുള്ളു’- മമത പറഞ്ഞു.
കൃഷ്ണനഗര്‍ മണ്ഡലത്തില്‍ മ?ഹുവ മൊയിത്രയുടെ തിരഞ്ഞെടുപ്പ് പ്രചാരണ റാലിയില്‍ മമത പറഞ്ഞു. ബിജെപിക്കെതിരെ ശബ്ദമുയര്‍ത്തിയതിനാണ് മഹുവ മൊയിത്രയെ ലോക്‌സഭയില്‍ നിന്ന് പുറത്താക്കിയതെന്നും മമത ബാനര്‍ജി പറഞ്ഞു.
ബംഗാളില്‍ പൗരത്വ ഭേദഗതി നിയമം നടപ്പാക്കാന്‍ അനുവദിക്കില്ലെന്ന് മമത ആവര്‍ത്തിച്ചു. പൗരത്വ ഭേദഗതിക്കായി അപേക്ഷിക്കുന്ന ജനങ്ങള്‍ക്ക് മമത മുന്നറിയിപ്പ് നല്‍കി. അപേക്ഷ നല്‍കുന്നതോടെ അവര്‍ വിദേശികളായി പരിഗണിക്കപ്പെടുമെന്നും അതുകൊണ്ടുതന്നെ അങ്ങനെ ചെയ്യരുതെന്നുമാണ് മമതയുടെ മുന്നറിയിപ്പ്.