തിരുവനന്തപുരം: ലിംഗമാറ്റ ശസ്ത്രക്രിയയിലൂടെ പുരുഷനായ ഇഷാനും ട്രാന്‍സ്‌ജെന്റര്‍ സൂര്യയും വിവാഹിതരായി. രാജ്യത്തെ നിയമവിധേയമായ ആദ്യ ട്രാന്‍സ്‌ജെന്റര്‍ വിവാഹമാണ് ഇവരുടേത്. തിരുവനന്തപുരം പ്രസ്‌ക്ലബിന് സമീപത്തെ മന്നം മെമ്മോറിയല്‍ നാഷനല്‍ ക്ലബ് ഹാളില്‍വച്ച് സ്‌പെഷല്‍ മാരേജ് ആക്ട് പ്രകാരമാണ് വിവാഹം നടന്നത്.
ഡബ്ബിങ് ആര്‍ട്ടിസ്റ്റ് ഭാഗ്യലക്ഷ്മി, മന്ത്രി കടകംപള്ളി സുരേന്ദ്രന്‍, ടി.എന്‍.സീമ, കൗണ്‍സിലര്‍ ഐ.പി.ബിനു, മേയര്‍ വി.കെ.പ്രശാന്ത് തുടങ്ങിയവര്‍ വിവാഹത്തില്‍ പങ്കെടുത്തു. ഇരുവരുടെയും ബന്ധുക്കളും സുഹൃത്തുക്കളായ ട്രാന്‍സ്‌ജെന്റഡര്‍ ജനങ്ങളും വിവാഹത്തിനെത്തിയിരുന്നു.
2014ലാണ് സൂര്യ ലിംഗമാറ്റ ശസ്ത്രക്രിയക്ക് വിധേയയായത്. ചാനല്‍ പരിപാടികളിലൂടെ പ്രേക്ഷകശ്രദ്ധ നേടിയ ആളാണ് സൂര്യ. സോഷ്യല്‍ ആക്ടിവിസ്റ്റും ഭിന്നലൈംഗിക പ്രവര്‍ത്തകയുമായ സൂര്യ ഡബ്ബിങ് ആര്‍ട്ടിസ്റ്റായും പ്രവര്‍ത്തിക്കുന്നുണ്ട്.