വെംബ്ലി: ഇന്ന് രാത്രി വെംബ്ലിയില്‍ തകര്‍പ്പന്‍ കോണിബോള്‍-യുവേഫ ട്രോഫിക്കായുള്ള പോരാട്ടം. ലാറ്റിനമേരിക്കയിലെ ചാമ്പ്യന്മാരായ ലിയോ മെസിയുടെ അര്‍ജന്റീനയും യൂറോപ്യന്‍ ചാമ്പ്യന്മാരായ ജോര്‍ജ് ചെലിനിയുടെ ഇറ്റലിയും തമ്മിലുള്ള അങ്കം. മുഴുവന്‍ ടിക്കറ്റുകളും നേരത്തെ വിറ്റഴിഞ്ഞ മല്‍സരത്തിന്റെ ആവേശം വാനോളമാണ്.
ഖത്തര്‍ ലോകകപ്പ് മുന്‍നിര്‍ത്തിയുള്ള ഒരുക്കത്തിലാണ് അര്‍ജന്റീന.മെസി തന്നെ നായകന്‍. പൂര്‍ണ ടീമിനെയാണ് കോച്ച് ലയണല്‍ സ്‌കലോനി രംഗത്തിറക്കുന്നത്. എന്നാല്‍ ഇറ്റലിക്ക് കാര്യങ്ങള്‍ എളുപ്പമല്ല. നിര്‍ഭാഗ്യത്തിന് ലോകകപ്പ് ടിക്കറ്റ് നഷ്ടമായവരാണ് അവര്‍. വന്‍കരാ ചാമ്പ്യന്മാരായിട്ടും തുടര്‍ച്ചയായി രണ്ടാം തവണയാണ് അവര്‍ക്ക് ലോകകപ്പ് ഫൈനല്‍ റൗണ്ട് നഷ്ടമാവുന്നത്.