വാഷിങ്ടണ്‍: അമേരിക്കയിലെ ഇന്ത്യാനയില്‍ 20 മിനുട്ടുകൊണ്ട് രണ്ട് ലിറ്റര്‍ വെള്ളം കുടിച്ച യുവതിക്ക് ദാരുണാന്ത്യം. ആഷ്‌ലി സമ്മേഴ്‌സ് എന്ന മുപ്പത്തഞ്ചുകാരിയാണ് മരിച്ചത്. ഇന്ത്യാനയിലെ ലേക്ക് ഫ്രീമാനില്‍ സന്ദര്‍ശനത്തിന് എത്തിയ യുവതി കൊടുംചൂടില്‍ നിര്‍ജലീകരണം അനുഭവപ്പെട്ടതിനെത്തുടര്‍ന്നാണ് അമിതമായി വെള്ളം കുടിച്ചത്.
നാലു കുപ്പി വെള്ളമാണ് ഇവര്‍ കുറഞ്ഞ സമയം കൊണ്ട് കുടിച്ചു തീര്‍ത്തത്. വാട്ടര്‍ ടോക്‌സിറ്റിയാണ് മരണ കാരണമെന്ന് മെഡിക്കല്‍ റിപ്പോര്‍ട്ടില്‍ പറയുന്നു. ഒരു ദിവസം കൊണ്ട് ഒരാള്‍ കുടിച്ചു തീര്‍ക്കേണ്ട വെള്ളമാണ് ഒറ്റയടിക്ക് കുടിച്ചത്. കുറഞ്ഞ സമയം കൊണ്ട് അമിതമായി വെള്ളം കുടിക്കുന്നത് ശരീരത്തിന് ഹാനികരമാണെങ്കിലും മരണം സംഭവിക്കുന്നത് അസാധാരണമാണെന്ന് ഡോക്ടര്‍മാര്‍ പറയുന്നു. രണ്ട് കുട്ടികളുടെ മാതാവാണ് ആഷ്‌ലി.