തിരുവനന്തപുരം: ഭാര്യ അറിയാതെ ഒളിപ്പിച്ചുവെച്ച മദ്യം എടുക്കുന്നതിനിടെ കൈ കുടുങ്ങിപ്പോയ മധ്യവയസ്‌കനെക്കുറിച്ചുള്ള വിഡിയോ പലരും വാട്‌സ്ആപ്പില്‍ കണ്ടു കാണും. എന്നാല്‍ ഈ വിഡിയോ വൈറലാക്കാനുള്ള ഏതോ ഒരാളുടെ ‘വികൃതിയില്‍’ നാണക്കേടുകൊണ്ട് വീടിന് പുറത്തിറങ്ങാന്‍ പോലുമാവാതെ കഷ്ടപ്പെടുകയാണ് ഈ വീട്ടുകാര്‍.
മാവേലിക്കരയിലെ മാന്നാര്‍ കുരട്ടിശ്ശേരി സുരഭിയില്‍ സുരേഷ് കുമാറും കുടുംബവുമാണ് നുണ പ്രചരണത്തില്‍ ദുരിതത്തിലായത്. കഴിഞ്ഞമാസം 26ന് രാത്രിയില്‍ വീട്ടിലെ കുളിമുറിയില്‍ അഴുക്കുവെള്ളം ഒഴുകിപ്പോകാതെ കെട്ടിക്കിടന്നു. പ്ലംബറെ വിളിച്ചിട്ടുവരാത്തതിനാല്‍ സ്വയം നന്നാക്കാനിറങ്ങി. പൈപ്പിലൂടെ കൈ കടത്തിയപ്പോള്‍ പൈപ്പിലെ അരിപ്പയുടെ സ്റ്റീല്‍വളയത്തില്‍ കൈ കുടുങ്ങുകയായിരുന്നു. തുടര്‍ന്ന് ഫയര്‍ ഫോഴ്‌സ് എത്തി രക്ഷപ്പെടുത്തി.
ഫയര്‍ഫോഴ്‌സ് തന്നെയാണ് വിഡിയോ ഫേയ്‌സ്ബുക്കില്‍ പങ്കുവെച്ചത്. എന്നാല്‍ ഈ വിഡിയോ മറ്റാരോ എടുത്ത് പ്രചരിപ്പിച്ചത് മറ്റൊരു അടിക്കുറിപ്പിലായിരുന്നു. ഭാര്യ അറിയാതെ ഒളിപ്പിച്ചുവെച്ച മദ്യം എടുക്കുന്നതിനിടെയാണ് ഇത് സംഭവിച്ചത് എന്നായിരുന്നു അയാളുടെ കണ്ടെത്തല്‍. വ്യാജ പ്രചാരണത്തോടെ വീഡിയോ വ്യാപകമായി പ്രചരിപ്പിക്കപ്പെട്ടതോടെ കുടുംബത്തിനു പുറത്തിറങ്ങാനാകാത്ത സ്ഥിതിയാണ്. ഭാര്യയും ഭര്‍ത്താവും ജോലിക്കു പോകുന്നില്ല. മകളുടെ കൂട്ടുകാരുടെ വാട്‌സ്ആപ്പ് ഗ്രൂപ്പുകളിലും ദൃശ്യങ്ങള്‍ പ്രചരിച്ചതോടെ കുടുംബം കൂടുതല്‍ സമ്മര്‍ദത്തിലായി.
വിഡിയോ പകര്‍ത്തിയ അഗ്‌നിശമന സേനാംഗങ്ങള്‍തന്നെ ഈ പ്രചാരണം നിഷേധിച്ചിട്ടുണ്ട്. ഈ വ്യാജപ്രചാരണത്തിനെതിരേ നിയമനടപടികള്‍ക്കൊരുങ്ങുകയാണു സുരേഷ്. കൊച്ചി മെട്രോയില്‍ സുഖമില്ലാതെ ഉറങ്ങിപ്പോയ യാത്രികനെ കള്ളു കുടിയനാക്കി പ്രചരിപ്പിച്ച സംഭവവും കേരളം കണ്ടതാണ്.