കൊച്ചി: കേരള ബ്ലാസ്‌റ്റേഴ്‌സ് പ്രീസീസണ്‍ തയ്യാറെടുപ്പുകള്‍ക്ക് തുടക്കമിടുന്നു. ഓഗസ്റ്റ് ഒന്നിന് കൊച്ചിയില്‍ പ്രീസീസണ്‍ പരിശീലനം ആരംഭിക്കുമെന്ന് ക്ലബ്ബ് ഔദ്യോഗികമായി അറിയിച്ചു. ഓഗസ്റ്റ് പകുതിയോടെ യുഎഇയിലേക്ക് പറക്കും. ഇവിടെ യുഎഇ ഫസ്റ്റ് ഡിവിഷന്‍ ക്ലബ്ബുകളായ അല്‍ നാസര്‍ എസ്‌സി, ദിബ എഫ്‌സി, ഹത്ത ക്ലബ് എന്നിവക്കെതിരെ സൗഹൃദ മത്സരങ്ങള്‍ കളിക്കും. അല്‍ നാസര്‍ കള്‍ച്ചറല്‍ ആന്‍ഡ് സ്‌പോര്‍ട്‌സ് ക്ലബ്ബിലായിരിക്കും ടീമിന്റെ പരിശീലനം. ഓഗസ്റ്റ് 20ന് ദുബായിലെ അല്‍മക്തൂം സ്‌റ്റേഡിയത്തില്‍ അല്‍നാസര്‍ എസ്‌സിക്കെതിരെയാണ് ബ്ലാസ്‌റ്റേഴ്‌സിന്റെ ആദ്യ പ്രീസീസണ്‍ സൗഹൃദ മത്സരം.
ഓഗസ്റ്റ് 25ന് ദിബ അല്‍ ഫുജൈറ സ്‌റ്റേഡിയത്തില്‍ ദിബ എഫ്‌സിയെയും, 28ന് അവസാന മത്സരത്തില്‍ ഹംദാന്‍ ബിന്‍ റാഷിദ് സ്‌റ്റേഡിയത്തില്‍ ഹത്ത സ്‌പോര്‍ട്‌സ് ക്ലബിനെയും ബ്ലാസ്‌റ്റേഴ്‌സ് നേരിടും. മൂന്ന് മത്സരങ്ങള്‍ക്കും ടിക്കറ്റ് വഴിയായിരിക്കും കാണികള്‍ക്കുള്ള പ്രവേശനം ഈ മേഖലയില്‍ ടീമിന് ധാരാളം ആരാധകരുള്ളതിനാല്‍, കേരള ബ്ലാസ്‌റ്റേഴ്‌സ് എഫ്‌സിക്ക് രണ്ടാം വീട് പോലെയാണ് യുഎഇയെന്ന് ക്ലബ്ബ് വാര്‍ത്താകുറിപ്പില്‍ അറിയിച്ചു. കഴിഞ്ഞ സീസണിലെ ബ്ലാസ്‌റ്റേഴ്‌സും ഹൈദരാബാദും തമ്മിലുള്ള അവസാന മത്സരം ദുബായ് എക്‌സ്‌പോയില്‍ പ്രദര്‍ശിപ്പിച്ചപ്പോള്‍, പതിനായിരത്തിലധികം ആരാധകര്‍ മത്സരം കാണാനെത്തിയിരുന്നു.