ദി കേരള സ്‌റ്റോറിയുടെ പ്രദര്‍ശനം സ്റ്റേ ചെയ്യണമെന്ന ഹരജിയില്‍ ഇടക്കാല ഉത്തരവില്ല. സ്റ്റേ അനുവദിച്ച് ഇടക്കാല ഉത്തരവിടണമെന്ന് ഹരജിക്കാരുടെ ആവശ്യം ഹൈക്കോടതി തള്ളി.
സിനിമയുടെ ട്രെയ്‌ലറില്‍ ഏതെങ്കിലുമൊരു മതത്തെ കുറ്റകരമായി ചിത്രീകരിച്ചിട്ടില്ലെന്ന് നിരീക്ഷിച്ച കോടതി, മതവികാരം വ്രണപ്പെടുത്തുന്ന ഒന്നുമില്ലെന്ന് സെന്‍സര്‍ബോര്‍ഡ് വ്യക്തമാക്കി. കേരള സ്‌റ്റോറി ചരിത്രം പറയുന്ന സിനിമ അല്ലെന്നും വെറും കഥയാണെന്നുമായിരുന്നു ഹരജി പരിഗണിക്കവെ കോടതിയുടെ നിരീക്ഷണം. കേരളം മതേതരത്വം ഉയര്‍ത്തിക്കാട്ടുന്ന സംസ്ഥാനമാണെന്നും സിനിമ കാണാതെ വിമര്‍ശനമുന്നയിക്കണോ എന്നും കോടതി ചോദിച്ചിരുന്നു.
അതേസമയം, ചിത്രത്തിന്റെ ടീസര്‍ സമൂഹമാധ്യമങ്ങളില്‍ നിന്ന് നീക്കുമെന്ന് നിര്‍മാതാവ് അറിയിച്ചു. ചിത്രം സാങ്കല്‍പിക കഥയാണെന്ന് തുടക്കത്തില്‍ എഴുതിക്കാണിക്കുമെന്നും നിര്‍മാതാവ് കോടതിയില്‍ വ്യക്തമാക്കി.