കഴിഞ്ഞ ദിവസം യുഡിഎഫ് സംഘടിപ്പിച്ച ‘സെക്രട്ടറിയേറ്റ് വളയല്‍’ പ്രതിഷേധ പരിപാടിക്കിടെ സംസാരിക്കുന്നതിനിടയില്‍ കുഴഞ്ഞു വീണപ്പോള്‍ ജനങ്ങള്‍ തന്നോട് കാണിച്ച സ്നേഹവും കരുതലും വളരെ വലുതാണെന്ന് മുസ്‌ലിം ലീഗ് നേതാവ് ഡോ.എം.കെ മുനീറിന്റെ ഫെയ്സ്ബുക്ക് പോസ്റ്റ്. തനിക്ക് വേണ്ടി പ്രാര്‍ത്ഥിച്ചവര്‍ക്കെല്ലാം നന്ദി പറഞ്ഞു കൊണ്ടാണ് അദ്ദേഹത്തിന്റെ പോസ്റ്റ്. ‘ഈ പ്രാര്‍ത്ഥനകളാണ് എന്നെ മുന്നോട്ട് നയിക്കുന്ന ഊര്‍ജ്ജം’ എന്ന് ഫെയ്സ്ബുക്ക് പോസ്റ്റില്‍ അദ്ദേഹം പറഞ്ഞു.
ഫെയ്സ്ബുക്ക് പോസ്റ്റിന്റെ പൂര്‍ണരൂപം
പ്രിയപ്പെട്ടവരെ,
നിങ്ങളുടെ ഈ സ്‌നേഹത്തിനും പ്രാര്‍ത്ഥനകള്‍ക്കും എങ്ങിനെയാണ് നന്ദി പറയേണ്ടത്..?
ഈ പ്രാര്‍ത്ഥനകളാണ് എന്നെ മുന്നോട്ട് നയിക്കുന്ന ഊര്‍ജ്ജം. യു ഡി എഫ് സംഘടിപ്പിച്ച ‘സെക്രട്ടറിയേറ്റ് വളയല്‍’ പ്രതിഷേധ പരിപാടിയില്‍ സംസാരിക്കാന്‍ എഴുന്നേറ്റപ്പോള്‍ ചെറിയൊരു തളര്‍ച്ച പോലെ അനുഭവപ്പെട്ടു. വളരെ വേഗത്തില്‍ അപകടങ്ങള്‍ ഒന്നുമില്ലാതെ പൂര്‍വ്വസ്ഥിതിയിലേക്ക് തിരിച്ചുവരാനും സംസാരിക്കാനും സാധിച്ചതില്‍ സര്‍വ്വശക്തനോട് നന്ദി പറയുന്നു.
നിമിഷനേരം കൊണ്ട് എനിക്ക് വന്നിട്ടുള്ള ഫോണ്‍ കോളുകള്‍ എന്നോടുള്ള നിങ്ങളുടെ സ്നേഹവും കരുതലും എത്രത്തോളം ആഴത്തില്‍ ആണെന്നതിന്റെ തെളിവാണ്.
ഈ സ്നേഹവും കരുതലും എന്നെ നിങ്ങളിലേക്ക് കൂടുതല്‍ അടുപ്പിക്കുന്നു. നിങ്ങള്‍ക്ക് വേണ്ടി നിങ്ങള്‍ക്കിടയിലൊരാളായി പ്രവര്‍ത്തിക്കാന്‍ എനിക്കെന്നും ഊര്‍ജ്ജം നല്‍കിയതും ഇതുതന്നെയാണ്. ഇനിയും നിങ്ങളോടൊപ്പം പ്രവര്‍ത്തിക്കാനുള്ള ആരോഗ്യവും ആയുസ്സും സര്‍വശക്തന്‍ നല്‍കേണമേ എന്ന് മാത്രമാണ് പ്രാര്‍ത്ഥന…
പ്രാര്‍ത്ഥനകളില്‍ ഉള്‍പ്പെടുത്തണം.