ഇരുചക്ര വാഹനാപകടത്തില്‍ പരിക്കേല്‍ക്കുകയും തുടര്‍ന്ന് ഗര്‍ഭഛിദ്രം സംഭവിക്കുകയും ചെയ്ത യുവതി ദേശീയപാത കരാറുക്കാര്‍ക്കെതിരെ നിയമപോരാട്ടത്തിന് ഒരുങ്ങുന്നു. കഴിഞ്ഞമാസം 16ന് പെരുമണ്ണ വള്ളിക്കുന്ന് വെളുത്തേടത്ത് അംജത്ഖാന്റെ ഭാര്യ ഇര്‍ഷാദ് ലുലുവിനാണ് കോഴിക്കോട് പന്തീകങ്കാവ് ജംങ്ഷനില്‍വെച്ച് റോഡ് നിര്‍മ്മാണ തൊഴിലാളികളുടെ അശ്രദ്ധമൂലം അപകടമുണ്ടായത്.
പന്തീരങ്കാവ് ജംങ്ഷനില്‍ നിന്ന് പെരുമണ്ണ റോഡിലേക്ക് പോകുമ്പോള്‍ ബൈപാസിലെ ഇടതുവശത്തുനിന്ന് രണ്ട് തൊഴിലാളികള്‍ ചുമലിലേറ്റി കൊണ്ടുവന്ന കമ്പി ഇര്‍ഷദിന്റെ ഇടതുകണ്ണില്‍ തട്ടി മുറിവേറ്റു. ഇതോടെ നിയന്ത്രണംവിട്ട് വണ്ടിയില്‍ നിന്ന് തെറിച്ചുവീണ് ഇടതുകാലില്‍ രണ്ടിടത്തായി എല്ല്‌പൊട്ടി. അപകടത്തിനുശേഷം രക്തസ്രാവം വന്നതോടെ ഡോക്ടറെ കാണിച്ചപ്പോഴാണ് ഇര്‍ഷദിന് ഗര്‍ഭഛിദ്രം സംഭവിച്ചതായി വ്യക്തമാകുന്നത്.