ഹൈദരാബാദ്: ഭാര്യയുടെ മരണത്തില്‍ തെലുങ്കു സിനിമാ-സീരിയല്‍ നടന്‍ മധു പ്രകാശിനെ അറസ്റ്റ് ചെയ്തു. മകളുടെ മരണത്തില്‍ പങ്കുണ്ടെന്ന ഭാര്യാപിതാവിന്റെ പരാതിയെ തുടര്‍ന്നാണ് നടന്‍ മധു പ്രകാശിന്റെ അറസ്റ്റ്. ഹൈദരാബാദ് സ്വദേശിയാണ് മരിച്ച ഭാരതി. ഇവരെ കഴിഞ്ഞ ദിവസമാണ് വീടിനുള്ളില്‍ തൂങ്ങി മരിച്ച നിലയില്‍ കണ്ടെത്തിയത്. സോഫ്റ്റ് വെയര്‍ എഞ്ചിനിയറായിരുന്നു ഭാരതി.
സ്ത്രീധനത്തുകയെച്ചൊല്ലി മധു പ്രകാശ് മകളെ പീഡിപ്പിച്ചിരുന്നുവെന്ന് ഭാര്യ പിതാവ് പരാതി നല്‍കിയിരുന്ു. ഇതിനെ തുടര്‍ന്നാണ് അറസ്റ്റ് ചെയ്തത്. പീഢനത്തെ തുടര്‍ന്ന് മകള്‍ ആത്മഹത്യ ചെയ്യുകയായിരുന്നുവെന്നും പരാതിയില്‍ പറയുന്നു. അതേസമയം, താന്‍ സീരിയലില്‍ അഭിനയിക്കുന്നതിന് ഭാരതിക്ക് താല്‍പ്പര്യമുണ്ടായിരുന്നില്ലെന്നും ഇതിനെ തുടര്‍ന്നാണ് ആത്മഹത്യയെന്നുമാണ് മധുവിന്റെ ഭാഗം.
2015 ലായിരുന്നു ഇരുവരുടേയും വിവാഹം. തെലുങ്കു സീരിയലുകളിലെ പ്രധാന താരമായ മധു പ്രകാശ് ബാഹുബലിയിലും അഭിനയിച്ചിട്ടുണ്ട്. പരാതിയുടെ അടിസ്ഥാനത്തിലാണ് അറസ്‌റ്റെന്ന് പൊലീസ് ഉദ്യോഗസ്ഥര്‍ വ്യക്തമാക്കി.