ഏറെ വിവാദം നിറഞ്ഞ ‘ദ കേരള സ്‌റ്റോറിയുടെ ഒ.ടി.ടി സ്ട്രീമിംഗ് പ്രതിസന്ധിയില്‍. ചിത്രത്തിന്റെ സ്ട്രീമിംഗ് അവകാശം ഇതുവരെ ഒരു പ്ലാറ്റ്‌ഫോമും വാങ്ങിയിട്ടില്ലെന്നും കേരള സ്‌റ്റോറിക്ക് ഒരു ഒ.ടി.ടി പ്ലാറ്റ്‌ഫോമില്‍ നിന്നും അനുയോജ്യമായ ഓഫര്‍ ലഭിച്ചിട്ടില്ല എന്നാണ് ചിത്രത്തിന്റെ നിര്‍മ്മാതാക്കള്‍ പറയുന്നു.
ചിത്രത്തിനു മികച്ച ഓഫറുകള്‍ വരുന്നില്ലെന്നും ഇതിനായി കാത്തിരിക്കുകയാണെന്നും സംവിധായകന്‍ സുദീപ്‌തോ സെന്‍ പറഞ്ഞു. വാര്‍ത്താ വെബ്‌സൈറ്റായ റെഡിഫുമായുള്ള ചര്‍ച്ചയ്ക്കിടെയാണ് ദി കേരള സ്റ്റോറി സംവിധായകന്‍ സുദീപ്‌തോ സെന്‍ ഇക്കാര്യം അറിയിച്ചത്. സിനിമാ മേഖല ഒന്നടങ്കം തങ്ങള്‍ക്ക് എതിരായി നില്‍ക്കുകയാണെന്നും സംവിധായകന്‍ കൂട്ടിച്ചേര്‍ത്തു.
ബോക്‌സ് ഓഫീസില്‍ വന്‍ വിജയം നേടിയതിനു തങ്ങളെ ശിക്ഷിക്കാന്‍ സിനിമാ വ്യവസായം ഒന്നിച്ചു ശ്രമിക്കുകയാണെന്നും നിര്‍മ്മാതാക്കള്‍ അവകാശപ്പെടുന്നു. ഞങ്ങളുടെ വിജയത്തിന് ഒരു പാഠം പഠിപ്പിക്കാന്‍ സിനിമ രംഗത്തെ ഒരു വിഭാഗം ഒന്നിച്ചതായി ഞങ്ങള്‍ക്ക് സംശയമുണ്ട്’ സുദീപ്‌തോ സെന്‍ കൂട്ടിച്ചേര്‍ത്തു.
കേരളത്തില്‍ നിന്നുള്ള ഹിന്ദു യുവതികളെ ഇസ്‌ലാം മതത്തിലേക്ക് പരിവര്‍ത്തനം ചെയ്ത് ഐഎസിലേക്ക് റിക്രൂട്ട് ചെയ്യപ്പെടുന്നുവെന്നാണ് കേരള സ്‌റ്റോറിയുടെ കഥ. പശ്ചിമ ബംഗാളില്‍ ചിത്രം നിരോധിച്ചപ്പോള്‍, ഉത്തര്‍പ്രദേശ്, മധ്യപ്രദേശ്, ഉത്തരാഖണ്ഡ് എന്നിവിടങ്ങളില്‍ സിനിമയ്ക്ക് നികുതി ഒഴിവാക്കിയിരുന്നു.