ന്യൂഡല്‍ഹി: രാജ്യത്തെ കോവിഡ് ബാധിതരുടെ എണ്ണം ഒരു കോടിയിലേക്ക്. 99,79,447 പേര്‍ക്ക് ഇതുവരെ കോവിഡ് സ്ഥിരീകരിച്ചതായി ആരോഗ്യ മന്ത്രാലയം പുറത്തുവിട്ട കണക്കുകള്‍ പറയുന്നു. അമേരിക്കയ്ക്ക് ശേഷം രോഗബാധിതരുടെ എണ്ണം ഒരു കോടിയിലെത്തുന്ന രണ്ടാമത്തെ രാജ്യമാകും ഇന്ത്യ. 95 ശതമാനത്തില്‍ അധികം പേര്‍ ഇതുവരെ രോഗമുക്തി നേടി. പ്രതിദിന കേസുകള്‍ രാജ്യത്ത് കുറയുന്നത് ആശ്വാസമായി.
നിലവില്‍ 95,20,827 പേര്‍ രോഗമുക്തരായിട്ടുണ്ട്. അതേ സമയം 1,44,789 ജീവനുകളും കോവിഡ് കാരണം നഷ്ടമായി. ആദ്യ കേസ് റിപ്പോര്‍ട്ട് ചെയ്ത 324ാം ദിവസമാണ് രാജ്യത്തെ കൊവിഡ് ബാധിതരുടെ എണ്ണം ഒരു കോടിയില്‍ എത്തുന്നത്.
രോഗമുക്തിയില്‍ ലോക രാജ്യങ്ങള്‍ക്ക് തന്നെ മുന്നിലാണ് ഇന്ത്യ. 95 ശതമാനത്തില്‍ അധികം പേര്‍ക്ക് രോഗമുക്തിയുണ്ട്. രോഗികളുടെ എണ്ണം 80 ലക്ഷത്തില്‍ നിന്ന് 90 ലക്ഷമായി കടന്നത് 22 ദിവസം കൊണ്ടാണെങ്കില്‍, 90 ലക്ഷത്തില്‍ നിന്നും ഒരു കോടിയില്‍ എത്തുന്നത് 28 ദിവസം കൊണ്ടാണ്.
രോഗബാധിതരുടെ പട്ടികയില്‍ ഒന്നാമത് ഉള്ള സംസ്ഥാനം മഹാരാഷ്ട്രയാണ്. 18 ലക്ഷത്തിലധികം പേര്‍ക്കാണ് ഇവിടെ രോഗം സ്ഥീരികരിച്ചത്. പ്രതിദിന കേസുകള്‍ ഏറ്റവും കൂടുതല്‍ റിപ്പോര്‍ട്ട് ചെയ്യുന്നത് കേരളത്തിലാണ്.