കേന്ദ്രസര്‍ക്കാരിന്റെ വികസിത് സങ്കല്‍പ് പരിപാടിയില്‍ പങ്കെടുത്ത സി.പി.ഐ നേതാവിന്റെ നടപടി വിവാദത്തില്‍. കിഴുവിലം പഞ്ചായത്ത് പ്രസിഡന്റും സി.പി.ഐ അംഗവുമായ രജിതയാണ് ബി.ജെ.പിയുടെ നേതൃത്വത്തില്‍ നടത്തുന്ന പ്രചാരണ പരിപാടിയില്‍ പങ്കെടുത്ത് വിവാദത്തിലായത്.
ലോക്‌സഭാ തിരഞ്ഞെടുപ്പ് ലക്ഷ്യമിട്ട് കേന്ദ്ര പദ്ധതികളുടെ പ്രചാരണം ലക്ഷ്യംവെച്ചാണ് വികസിത് ഭാരത് സങ്കല്‍പ്പ് യാത്ര എന്ന പേരിലുള്ള പരിപാടി സംസ്ഥാനങ്ങളില്‍ നടത്തുന്നത്. പദ്ധതിയുടെ ഭാഗമായി കിഴുവിലം പഞ്ചായത്തിലായിരുന്നു കഴിഞ്ഞ ദിവസം വികസിത് ഭാരത് സങ്കല്‍പ്പ് യാത്ര എത്തിയത്. പഞ്ചായത്തിലെ പരിപാടി ഉദ്ഘാടനം ചെയ്ത പഞ്ചായത്ത് പ്രസിഡന്റിനെതിരെ പാര്‍ട്ടിക്കുള്ളിലും എതിര്‍പ്പ് ഉയര്‍ന്നിട്ടുണ്ട്.
രാഷ്ട്രീയ ലക്ഷ്യത്തോടെ നടക്കുന്നുവെന്നാരോപിച്ച് വികസിത് ഭാരത് സങ്കല്‍പ് യാത്രയോട് ഇടത് കക്ഷികള്‍ സഹകരിച്ചിരുന്നില്ല. ഇതിനിടെയാണ് പരിപാടിയില്‍ സി.പി.ഐ അംഗമായ പഞ്ചായത്ത് പ്രസിഡന്റ് പങ്കെടുത്തത്.
നേരത്തെ കോട്ടയത്തും എറണാകുളത്തും സി.പി.എം നേതാക്കള്‍ വികസിത് ഭാരത് യാത്രയില്‍ പങ്കെടുത്തത് വിവാദമായിരുന്നു. കോട്ടയം വെള്ളൂരില്‍ പഞ്ചായത്ത് പ്രസിഡന്റ് ആര്‍. നികിത കുമാര്‍ ആയിരുന്നു പങ്കെടുത്ത് പ്രസംഗിച്ചത്. എറണാകുളം മരട് നഗരസഭയിലെ സി.പി.എം കൗണ്‍സിലര്‍ ജിജി പ്രേമന്‍ യാത്രയുടെ ഉദ്ഘാടകയായിരുന്നു.