മധ്യപ്രദേശില്‍ ദലിത് യുവാവിനെ ആള്‍ക്കൂട്ടം മര്‍ദ്ദിച്ചു കൊലപ്പെടുത്തി. മകനെ രക്ഷിക്കാന്‍ ശ്രമിച്ച അമ്മയെ വസ്ത്രമുരിഞ്ഞ് നഗ്‌നയാക്കി, മര്‍ദ്ദിച്ച് അവശയാക്കുകയും ചെയ്തു. മധ്യപ്രദേശിലെ സാഗര്‍ ജില്ലയിലാണ് സംഭവം.
സംഭവത്തില്‍ എട്ടു പേരെ അറസ്റ്റ് ചെയ്‌തെന്നും ഒരാള്‍ കൂടി പിടിയിലാകാനുണ്ടെന്നും അഡീഷണല്‍ പൊലീസ് സൂപ്രണ്ട് സഞ്ജീവ് ഉയ്കി പറഞ്ഞു. കൊല്ലപ്പെട്ട യുവാവിന്റെ സഹോദരി 2019ല്‍ പ്രദേശത്തെ നാലു യുവാക്കള്‍ക്കെതിരെ തന്നെ ആക്രമിച്ചതിനും ഭീഷണിപ്പെടുത്തിയതിനും കേസ് നല്‍കിയിരുന്നു. ലാലു എന്ന നിതിന്‍ അഹിര്‍വാര്‍ (18) ആണ് കൊല്ലപ്പെട്ടത്. 12 ഓളം പേര്‍ അടങ്ങുന്ന സംഘമാണ് അക്രമണം നടത്തിയതെന്നാണ് പൊലീസ് റിപ്പോര്‍ട്ട്.