ലോകകപ്പ് കിരീടത്തിനായുള്ള അങ്കം മുറുകുകയാണ്. വാശിയും വീറും കടുത്ത ഖത്തര്‍ ലോകകപ്പില്‍ ഇന്ന് അര്‍ജന്റീന കളത്തിലിറങ്ങുമ്പോള്‍ പടനായകന്‍ ലയണല്‍ മെസ്സിക്കിത് കരിയറിലെ 1,000ാമത്തെ മത്സരം. ക്ലബ് തലത്തില്‍ ലാ ലിഗ അതികായരായ ബാഴ്‌സലോണക്കായി 778 കളിയും പി.എസ്.ജി ക്ക് 53 കളിയുമാണ് ഇതുവരെ തിമിര്‍ത്താടിയത്. ദേശീയ അടയാളപ്പെടുത്തലിന്റെ 169ാം മത്സരത്തിനാണ് ഇന്നിറങ്ങുന്നത്.
ഇപ്രാവശ്യത്തെ ലോകകപ്പില്‍ മെസ്സി രണ്ടു തവണയാണ് എതിരാളികളുടെ വല കുലുക്കിയിട്ടത്്. ഗോള്‍ ശ്രമങ്ങള്‍ 23 ഉം. പലതും തലനാരിഴക്കാണ് തെറിച്ച് പോയത്. ഇതുവരെ ഏഴു തവണയാണ് ഇരു ടീമുകളും മുഖാമുഖം വന്നിട്ടുള്ളത്. ഒരു തവണ ആസ്‌ട്രേലിയ വിജയക്കൊടി ഏന്തുകയും ചെയ്തു. മെസ്സിയുടെ കരിയറിലെ നിര്‍ണായ അക്കത്തിന്റെ കളിയാണ് ഇന്ന് കളിക്കളത്തില്‍ നിറയാനിരിക്കുന്നത്.