ഇന്ത്യന്‍ ക്രിക്കറ്റ് സൂപ്പര്‍താരം സച്ചിന്‍ ടെണ്ടുല്‍ക്കറുടെ ഡീപ്ഫേക്ക് വീഡിയോ പുറത്ത്. ഓണ്ലൈന് ഗെയിം പരിചയപ്പെടുത്തുന്ന രീതിയിലാണ് സച്ചിന്റെ വ്യാജ വീഡിയോ പ്രചരിക്കുന്നത്. താനും മകളും ഈ ഓണ്ലൈന് ഗെയിം കളിക്കാറുണ്ടെന്നും പണമുണ്ടാക്കാറുണ്ടെന്നുമുള്ള രീതിയിലായിരുന്നു വ്യാജ വീഡിയോ. നടിമാരായ രശ്മിക മന്ദാന, കരീന കപൂര്‍, ആലിയ ഭട്ട് എന്നിവര്‍ക്ക് പിന്നാലെ ബോളിവുഡ് സുന്ദരി ഐശ്വര്യ റായി ബച്ചന്റെ ഡീപ്ഫേക്ക് വീഡിയോയും സാമൂഹ്യമാധ്യമങ്ങളില്‍ സജീവമായിരിക്കുകയാണ്. ഇതിന് പി്ന്നാലെയാണ് സച്ചിന്റെയും വീഡിയോ പുറത്തിറങ്ങിയിരിക്കുന്നത്.
വീഡിയോയ്ക്ക് എതിരെ പ്രതികരിച്ച് താരം ഇപ്പോള്‍ രംഗത്ത് വന്നിട്ടുണ്ട്. തന്റെ പേരിലടക്കം പ്രചരിക്കുന്ന വീഡിയോകള്‍ അസ്വസ്ഥമാക്കുന്നുവെന്ന് സച്ചിന്‍ വ്യക്തമാക്കി. എല്ലാവരും ഇത്തരം വിഡിയോകള്‍ റിപ്പോര്‍ട്ട് ചെയ്യണം സാമൂഹിക മാധ്യമ കമ്പനികള്‍ വിഷയത്തില്‍ ജാഗ്രത പുലര്‍ത്തണം ഇത് തുടരാതിരിക്കാന്‍ ദ്രുതഗതിയിലുളള നടപടി എടുക്കണമെന്നും താരം എക്സില്‍ കുറിച്ചു. സച്ചിന്റെ മുഖം ഉപയോഗിച്ച് പ്രചരിക്കുന്ന ഓണ്ലൈന് ഗെയിംമിന്റെ പരസ്യ ചിത്രവും ക്രിക്കറ്റ് ഇതിഹാസം പോസ്റ്റ് ചെയ്തു.