കുളത്തൂപ്പുഴയില്‍ ഉണക്കമീന്‍ വിലകുറച്ചു വിറ്റതിന് യുവാവിനെ മര്‍ദിച്ചതായി പരാതി. കുളത്തൂപ്പുഴ സ്വദേശിയായ നൗഷാദിനാണ് പരിക്കേറ്റത്. ചന്തക്ക് പുറത്ത് കച്ചവടം നടത്തിയിരുന്ന ഇയാളെ മറ്റ് വ്യാപാരികള്‍ കൂട്ടം കൂടിയെത്തി മര്‍ദിക്കുകയായിരുന്നുവെന്നാണ് പരാതി. പരാതിയില്‍ നാല് പേര്‍ക്കെതിരെ കുളത്തൂപ്പുഴ പൊലീസ് കേസെടുത്തു.
കുളത്തൂപ്പുഴ മാര്‍ക്കറ്റില്‍ കഴിഞ്ഞ ദിവസമായിരുന്നു സംഭവം. മാര്‍ക്കറ്റിന് പുറത്തു ഓട്ടോയില്‍ എത്തി ഉണക്കമീന്‍ വിലകുറച്ചു വിറ്റതിന് മറ്റ് വ്യാപാരികള്‍ മര്‍ദിക്കുകയായിരുന്നുവെന്നാണ് നൗഷാദ് പറയുന്നത്. നൗഷാദിനെ മര്‍ദിക്കുന്നത് കണ്ട ഓട്ടോറിക്ഷ തൊഴിലാളികളും നാട്ടുകാരുമാണ് പോലീസില്‍ വിവരം അറിയിച്ചത്.
ഉണക്കമീന്‍ വിലകുറച്ചു വിറ്റതിനാല്‍ നൗഷാദിന് അടുത്ത് വലിയ തിരക്കായിരുന്നു. മറ്റുള്ളവര്‍ക്ക് കച്ചവടവും കുറഞ്ഞു, ഇതാണ് കാരണമായി പറയുന്നത്. താന്‍ വലിയ ലാഭം എടുക്കാതെയാണ് കച്ചവടം നടത്തുന്നതെന്ന് നൗഷാദ് പറയുന്നു.
നൗഷാദിന്റെ മൊഴി രേഖപ്പെടുത്തിയ പോലീസ് കുളത്തുപ്പുഴ സ്വദേശികളായ നജിമുദീന്‍, സമീര്‍ഷാ, റെജി, രജനീകാന്ത് എന്നിവര്‍ക്കെതിരെ കേസെടുത്തു.