കൊച്ചി: കൊല്‍ക്കത്തയില്‍ തുടങ്ങിയ ഡ്യൂറന്‍ഡ് കപ്പ് ടൂര്‍ണമെന്റിനുള്ള കേരള ബ്ലാസ്റ്റേഴ്സ് സ്‌കാഡിനെ ഒരു ദിവസത്തിനകം പ്രഖ്യാപിക്കും. യുവതാരങ്ങള്‍ക്ക് മുന്‍ഗണന നല്‍കിയായിരിക്കും ടീമിനെ പ്രഖ്യാപിക്കുകയെന്നാണ് സൂചന. ജംഷഡ്പൂര്‍ എഫ്സി ഉള്‍പ്പെടെയുള്ള ടീമുകള്‍ യുവനിരക്കാണ് പ്രാധാന്യം നല്‍കുന്നത്. നിലവില്‍ എറണാകുളം പനമ്പിള്ളിനഗര്‍ ഗ്രൗണ്ടില്‍ പരിശീലനം നടത്തുന്ന ടീം 9ന് കൊല്‍ക്കത്തയിലേക്ക് തിരിക്കും.
ആഗസ്ത് 13ന് ഗോകുലം കേരള എഫ്സിയുമായാണ് ടീമിന്റെ ആദ്യമത്സരം. 18ന് ബെംഗളൂരു എഫ്സി, 21ന് ഇന്ത്യന്‍ എയര്‍ഫോഴ്സ് എന്നിങ്ങനെയാണ് മറ്റു മത്സരങ്ങള്‍. ഡ്യൂറന്‍ഡ് കപ്പിന് മുമ്പ് കൂടുതല്‍ സൗഹൃദ മത്സരങ്ങള്‍ നടത്താന്‍ ടീം ശ്രമിക്കുന്നുണ്ടെങ്കിലും മികവുള്ള ടീമിനെ കിട്ടാത്തത് തിരിച്ചടിയാണ്. കെപിഎല്‍ ടീമുകളൊന്നും നിലവില്‍ പരിശീലന ക്യാമ്പ് തുടങ്ങിയിട്ടില്ല.