നിയമസഭയില്‍ ഇരിക്കുന്നത് സംസ്ഥാനത്തെ ജനങ്ങളുടെ പ്രതിനിധികളാണ്. നിയമസഭയെ സ്വന്തം കോപ്രായങ്ങള്‍ക്ക് പ്രതിപക്ഷം ഇരയാക്കുമ്പോള്‍ അപമാനിക്കപ്പെടുന്നത് ഇവിടുത്തെ ജനങ്ങളാണ്. ഇത്രയും തരംതാണ സ്വഭാവം കാണിക്കുന്ന പ്രതിപക്ഷനേതാവ് കേരളത്തിന്റെ ചരിത്രത്തിലുണ്ടായിട്ടില്ല. മുമ്പ് ഞങ്ങള്‍ നടത്തിയ പ്രതിഷേധത്തെ അനുകൂലിച്ചവരാണോ ഇന്നത്തെ പ്രതിപക്ഷ മെന്നും ഇടതുമുന്നണി കണ്‍വീനര്‍ ഇ.പി ജയരാജന്‍ ആരാഞ്ഞു. പാര്‍ട്ടി പത്രത്തിലെഴുതിയ ലേഖനത്തിലാണ് സ്വന്തം ചെയ്തികളെ കൊഞ്ഞനംകുത്തുന്ന പ്രസ്താവന ജയരാജന്‍ നടത്തിയിരിക്കുന്നത്.
നിയമസഭയില്‍ കയ്യാങ്കളി നടത്തുകയും ഭരണകക്ഷി അംഗങ്ങളെ മര്‍ദിക്കുകയും വിലപിടിപ്പുള്ള കേസരയും മേശയും തല്ലിപ്പൊളിക്കുകയും ചെയ്തതിന് ജയരാജനുള്‍പ്പെടെ കേസ് നേരിടുകയാണ്. ഇപ്പോള്‍ പ്രതിപക്ഷം നടത്തിയ പോലുള്ള വ്യാജപ്രചാരണം മറ്റാരും നടത്തിയിട്ടില്ലെന്നും അദ്ദേഹം പറയുന്നു. ഇതൊക്കെ വായിച്ച് സഖാക്കള്‍ തന്നെ മൂക്കത്ത് വിരല്‍വെക്കുകയാണ്. അടിയന്ത്രിരപ്രമേയത്തിന്റെ പ്രാധാന്യം പോലും അറിയാതെയാണ് പ്രതിപക്ഷം പെരുമാറുന്നതെന്നും ജയരാജന്‍ വിമര്‍ശിച്ചു. മാധ്യമങ്ങള്‍ പ്രതിപക്ഷത്തിന് അമിതപ്രാധാന്യം നല്‍കുന്നതായും അദ്ദേഹം ലേഖനത്തില്‍ പരാതിപ്പെടുന്നു.