ഇന്ദോര്‍: ബലാത്സംഗക്കേസില്‍ ദേര സച്ച സൗധ മേധാവി ഗുര്‍മിത് റാം റഹീം സിങ്ങിനെ ശിക്ഷിച്ച നടപടി ആത്മീയ നേതൃത്വങ്ങളെ വിഷമിപ്പിച്ചതായി യോഗ ഗുരു ബാബാ രാംദേവ്. ഒരു ആള്‍ദൈവം ക്രിമിനല്‍ കേസില്‍ ശിക്ഷിക്കപ്പെട്ടതിന് മുഴുവന്‍ സന്യാസി വര്‍ഗത്തെയും തെറ്റായ രീതിയില്‍ കാണാന്‍ പാടില്ലെന്ന് രാംദേവ് മുന്നറിയിപ്പ് നല്‍കി. കഴിഞ്ഞ രണ്ടുമൂന്നു വര്‍ഷമായി ഇത്തരം കേസുകള്‍ ഉയര്‍ന്നുവരുന്നത് അഭിമുഖീകരിക്കാന്‍ വിഷമമുണ്ടായെന്നത് സത്യമാണ്. ഇന്ദോറില്‍ ഒരു സ്വകാര്യ പരിപാടിയില്‍ പങ്കെടുക്കാനെത്തിയതായിരുന്നു രാംദേവ്.
നൂറ്റാണ്ടുകള്‍ക്കു മുമ്പ് ഇന്ത്യന്‍ സന്യാസിമാര്‍ നിര്‍വഹിച്ച നിലപാടുകള്‍ പിന്തുടരാന്‍ രാംദേവ് മതആത്മീയ നേതാക്കളെ ഉപദേശിച്ചു. സത്യസന്ധതയും വിശുദ്ധിയും പൊതുജന സേവനവും നിറഞ്ഞ ജീവിതം നയിക്കുന്ന, ദശലക്ഷക്കണക്കിന് സന്യാസിമാര്‍ ഇപ്പോഴും രാജ്യത്തുണ്ട്. ഇന്ത്യന്‍ സംസ്‌കാരത്തിന്റെ ഏറ്റവും വലിയ ചിഹ്നമാണ് ശ്രീരാമന്‍.
രാമന്റെ പേരുള്ള ഒരാളില്‍ എന്തെങ്കിലും കുഴപ്പം ഉണ്ടെങ്കില്‍ അത് ആ വ്യക്തിയുടെ സ്വഭാവത്തിന്റേത് മാത്രമാണ്. അതിനെ മുഴുവന്‍ മതവുമായോ സംസ്‌കാരവുമായോ ബന്ധപ്പെടുത്തരുത്. മതആത്മീയ നേതാക്കള്‍ നൂറ്റാണ്ടുകള്‍ക്കു മുമ്പേ തങ്ങളുടെ സന്യാസികള്‍ സ്ഥാപിച്ച പെരുമാറ്റച്ചട്ടങ്ങള്‍ പാലിക്കണമെന്നും രാംദേവ് പറഞ്ഞു.