റിലീസിന് മണിക്കൂറുകള്‍ മാത്രം ബാക്കിനില്‍ക്കെ ദളപതി വിജയിയുടെ ചിത്രം ‘ലിയോ’യുടെ തുടക്ക സീന്‍ ചോര്‍ന്നു. ഒന്‍പതും പത്തും സെക്കന്റ് ദൈര്‍ഘ്യമുള്ള സിനിമയുടെ തുടക്ക സീനുകളാണ് ഇപ്പോള്‍ എക്‌സിലൂടെ പ്രചരിക്കുന്നത്. സെന്‍സറിംഗിനോ മറ്റോ ഉള്ള പ്രിവ്യൂവിന്റെ ഭാഗമായി നടത്തിയ പ്രദര്‍ശനത്തിനിടെയാണ് വിഡിയോ ചിത്രീകരിച്ചതെന്നാണ് സൂചന.
ലീക്ക്ഡ് എന്ന ഹാഷ് ടാഗോടെയാണ് പുറത്തെത്തിയ സീനുകള്‍ പ്രചരിക്കുന്നത്. വമ്പന്‍ ഹൈപ്പോടെ അണിയറയില്‍ ഒരുങ്ങിയ ചിത്രത്തിലെ ഒരു ചെറിയ സസ്‌പെന്‍സ് പോലും പുറത്തു വിടാതെ അണിയറപ്രവര്‍ത്തകര്‍ പാലിച്ച സൂക്ഷ്മതയാണ് ഇപ്പോള്‍ ഇല്ലാതായത്.
അതേസമയം ഇതിനെതിരെ വിജയ് ആരാധകര്‍ രംഗത്തെത്തി. ഇത്രയും മനുഷ്യരുടെ ദീര്‍ഘനാളത്തെ അധ്വാനത്തിന് പുല്ലുവില കല്‍പ്പിച്ചുകൊണ്ടുള്ള പ്രവൃത്തി അവസാനിപ്പിക്കണമെന്നും വിഡിയോ പങ്കുവെക്കരുതെന്നും എക്‌സിലൂടെ ആരാധകര്‍ ആഹ്വാനം ചെയ്തു.
കര്‍ശന നടപടിയുമായി നിര്‍മാതാക്കളും രംഗത്തെത്തിയിട്ടുണ്ട്. ലീക്ക്ഡ് വിഡിയോ പ്രചരിപ്പിക്കുന്ന എക്‌സ് ഹാന്‍ഡിലുകള്‍ സസ്‌പെന്‍ഡ് ചെയ്തു. ബ്ലോക്ക് എക്‌സ്, മാസ്ബങ്ക് ആന്റിപൈറസി തുടങ്ങിയ ആന്റി പൈറസി കമ്പനികള്‍ക്കാണ് ഇതിനായുള്ള ചുമതല നിര്‍മാതാക്കളായ സെവന്‍ സ്‌ക്രീന്‍ സ്റ്റുഡിയോ നല്‍കിയിരിക്കുന്നത്. നാളെ പുലര്‍ച്ചെ 9 മണിക്ക് കേരളത്തില്‍ ലിയോയുടെ പ്രദര്‍ശനം ആരംഭിക്കും. നേരത്തെ വിജയ്‌ലോകേഷ് ചിത്രം മാസ്റ്ററിലെ ദൃശ്യങ്ങളും ഇത്തരത്തില്‍ ചോര്‍ന്നിരുന്നു.