ലണ്ടന്‍: കളിയിലെ 70 ശതമാനവും നേരവും പന്ത് കൈവശം വച്ചത് ലിവര്‍പൂള്‍. ഷോട്ടിലും ഷോട്ട് ഓണ്‍ ടാര്‍ഗറ്റിലും മുമ്പില്‍. എന്നിട്ടും ലിവര്‍പൂള്‍ തോറ്റു. അതും നെഞ്ചു തകര്‍ന്നു തന്നെ വീണു. ഒന്നും രണ്ടിനുമല്ല, രണ്ടിനെതിരെ ഏഴു ഗോള്‍ക്കായിരുന്നു തോല്‍വി. ചാമ്പ്യന്മാരെ കെട്ടുകെട്ടിച്ചത് ആസ്റ്റണ്‍ വില്ല.
മാഞ്ചസ്റ്റര്‍ യുനൈറ്റഡ് ടോട്ടന്‍ഹാമിനോട് 6-1ന് തോറ്റ വാര്‍ത്ത എത്തിയതിനു പിന്നാലെയാണ് ആസ്റ്റണ്‍ വില്ലയുടെ തട്ടകത്തില്‍ യുര്‍ഗന്‍ ക്ലോപ്പും സംഘവും കമിഴ്ന്നടിച്ചു വീണത്.
ഒല്ലി വാറ്റ്കിന്‍സിന്റെ ഹാട്രിക്കും ജാക്ക് ഗ്രീലിഷിന്റെ ഇരട്ടഗോളുമാണ് ലിവര്‍പൂളിന്റെ കഥ കഴിച്ചത്. ജോണ്‍ മക്ഗിന്‍, റോസ് ബാര്‍ക്ലി എന്നിവരും സ്‌കോര്‍ ചെയ്തതോടെ ലിവര്‍പൂളിന് ചരിത്രത്തിലെ ഏറ്റവും വലിയ തോല്‍വിയായി. ലിവര്‍പൂള്‍ നേടിയ രണ്ട് ആശ്വാസ ഗോളുകളും സലാഹിന്റെ വകയായിരുന്നു.