തിരുവനന്തപുരത്ത് നിരോധിത മയക്കുമരുന്നായ എം.ഡി.എം.എയുമായി അഞ്ച് യുവാക്കളെ പൊലീസ് പിടികൂടി. വലിയതുറ കൊച്ചുതോപ്പ് ഭാഗത്തുനിന്നാണ് സംഘത്തെ പിടികൂടിയത്. വലിയതുറ കൊച്ചുതോപ്പ് ലിസി റോഡില്‍ എബിയെന്ന ഇഗ്നേഷ്യസിന്റെ (23) വീട്ടില്‍ നിന്നാണ് വില്‍പനക്കായി വെച്ച എം.ഡി.എം.എ പിടിച്ചെടുത്തത്.
പൂന്തുറ പള്ളിത്തെരുവ് മുഹമ്മദ് അസ്‌ലം(23) വെട്ടുകാട് ബാലനഗര്‍ ജോണ്‍ ബാപ്പിസ്റ്റ്(24) വെട്ടുകാട് വാര്‍ഡില്‍ ശ്യാം ജെറോം(25) കരിക്കകം എറുമല അപ്പൂപ്പന്‍ കോവിലിന് സമീപം വിഷ്ണു(26) എന്നിവരെയാണ് വലിയതുറ പൊലീസ് അറസ്റ്റ് ചെയ്തത്. പ്രതികളില്‍ നിന്ന് 1.23 ഗ്രാം എം.ഡി.എം.എയാണ് പിടികൂടിയത്.
കേസിലെ ഒന്നാം പ്രതി കൊലപാതക ശ്രമം, മയക്കുമരുന്ന് വില്‍പന, സ്ത്രീകളെ ഉപദ്രവിക്കല്‍ ഉള്‍പ്പടെ 11 കേസുകളില്‍ പ്രതിയാണ്. രണ്ടാം പ്രതി മയക്കുമരുന്ന്, അടിപിടി എന്നീ കേസുകളിലും മൂന്നാം പ്രതി മയക്കുമരുന്ന്, കൊലപാതകശ്രമം, ഔദ്യോഗിക കൃത്യ നിര്‍വഹണം തടസ്സപ്പെടുത്തല്‍ തുടങ്ങീ ഒമ്പത് കേസുകളിലും നാലാം പ്രതി ഭവനഭേദനം, മയക്കുമരുന്ന് ഉള്‍പ്പടെ മൂന്ന് കേസുകളിലും 5ആാം പ്രതി 20 കിലോ കഞ്ചാവ് കൈവശം സൂക്ഷിച്ച കേസിലും പ്രതികളാണ്. പ്രതികളെ കോടതി റിമാന്‍ഡ് ചെയ്തു.