തിരുവനന്തപുരം: നെടുമങ്ങാട് ഡിവൈഎഫ്‌ഐ നടത്തിയ ബിബിസി ഡോക്യുമെന്ററി പ്രദര്‍ശനത്തിന് നേരെ ബിജെപി പ്രതിഷേധം.ഡോക്യുമെന്ററി പ്രദര്‍ശനം നടന്നുകൊണ്ടിരിക്കുന്ന സമയത്താണ് ബിജെപി പ്രവര്‍ത്തകര്‍ പ്രതിഷേധവുമായി എത്തിയത്. സ്ത്രീകളടക്കം അമ്ബതോളം പ്രവര്‍ത്തകര്‍ മുദ്രാവാക്യം വിളിച്ചെത്തിയാണ് പ്രദര്‍ശനം തടയാന്‍ ശ്രമിച്ചത്. ബിജെപി പ്രവര്‍ത്തകരും പൊലീസും തമ്മില്‍ ഉന്തും തള്ളുമുണ്ടായി. തുടര്‍ന്ന് പ്രതിഷേധക്കാരെ പൊലീസ് അറസ്റ്റ് ചെയ്തുനീക്കി.
മോദിക്കെതിരെയുള്ള ഡോക്യുമെന്ററി പ്രദര്‍ശിപ്പിക്കുകയാണെങ്കില്‍ തടയുമെന്ന് ബിജെപി നേരത്തെ പ്രഖ്യാപിച്ചിരുന്നു. പ്രദര്‍ശനം നടക്കുന്ന 100 മീറ്റര്‍ അകലെ പ്രതിഷേധക്കാരെ പൊലീസ് തടഞ്ഞു. പക്ഷേ പ്രതിഷേധക്കാരായ വനിതാ പ്രവര്‍ത്തകര്‍ പോലീസിനെ മറികടന്ന് പ്രദര്‍ശന സ്ഥലത്തേക്ക് എത്തിയതാണ് സംഘര്‍ഷ സാധ്യതയുണ്ടാക്കിയത്. കൂടുതല്‍ പൊലീസെത്തി പ്രവര്‍ത്തകരെ അവിടെനിന്നും മാറ്റി. തുടര്‍ന്ന് പൊലീസ് സംരക്ഷണയിലാണ് പ്രദര്‍ശനം തുടര്‍ന്നത്.