നാഗ്പൂരില്‍ മരിച്ച സൈക്കിള്‍ പോളോ താരം ഫാത്തിമ നിദക്ക് നീതി ലഭിച്ചില്ലെന്ന് കുടുംബം. മരിച്ച് മൂന്നുമാസം പിന്നിട്ടിട്ടും ഇതുവരെ പോസ്റ്റുമോര്‍ട്ടം റിപ്പോര്‍ട്ടും ലഭിച്ചിട്ടില്ല. മകളുടെ വേര്‍പാട് ഉണ്ടാക്കിയ ആഘാതത്തില്‍ നിന്ന് മാതാവ് ഇനിയും മുക്തയാകാത്തതിനാല്‍ ഭാര്യയെ തനിച്ച് ജോലിക്ക് പോകാന്‍ ഭയമാണെന്ന് നിദയുടെ പിതാവ് ശിഹാബ് ഫേസ്ബുക്കില്‍ പോസ്റ്റിട്ടു.
മകള്‍ മരിച്ച് മൂന്നുമാസം കഴിഞ്ഞിട്ടും മരണകാരണം അറിയാനാവാത്തതിന്റെ സങ്കടത്തിലാണ് ശിഹാബുദ്ദീന്‍. കഴിഞ്ഞ 22നാണ് ഫാത്തിമ നിദ നാഗ്പൂരിലെ സ്വകാര്യ ആശുപത്രിയില്‍ മരിച്ചത്. അസുഖങ്ങളൊന്നുമില്ലാതിരുന്ന നിദയുടെ മരണത്തില്‍ കുടുംബവും കൂടെയുണ്ടായിരുന്നവരും ചികിത്സാ പിഴവ് ആരോപിച്ചിരുന്നു.
നാഗ്പൂര്‍ പൊലീസ് കേസെടുത്തിരുന്നെങ്കിലും അന്വേഷണം എങ്ങുമെത്തിയില്ല. പോസ്റ്റുമോര്‍ട്ടം പോലും ഇതുവരെ ലഭ്യമാക്കാന്‍ സര്‍ക്കാരിനായില്ല. മകള്‍ക്ക് നീതി കിട്ടാന്‍ എന്ത് ചെയ്യണമെന്നറിയാതെ സഹായത്തിന് കാത്തിരിക്കുയാണ് നിദയുടെ മാതാപിതാക്കള്‍.