കോഴിക്കോട് മാങ്കാവിനടുത്ത് തൃശാലക്കുളത്ത് വാടക വീട്ടില്‍ ഒഡീഷ സ്വദേശിനിയായ യുവതിയേയും മകളേയും തീ പൊള്ളലേറ്റ് മരിച്ച നിലയില്‍ കണ്ടെത്തി. ഒഡീഷ സ്വദേശിയായ അനില്‍ ബിക്കാരി ദാസിന്റെ ഭാര്യ രൂപാലിയ (22) മകള്‍ ആരാധ്യ (3) എന്നിവരെയാണ് മരിച്ച നിലയില്‍ കണ്ടെത്തിയത്.തഹസീദാറിന്റെ നേതൃത്വത്തില്‍ ഇന്‍ക്വസ്റ്റ് നടപടികള്‍ ആരംഭിച്ചു.
കഴിഞ്ഞ ദിവസമായിരുന്നു സംഭവം. അനില്‍ ബിക്കാരി ജോലി കഴിഞ്ഞ് എത്തുമ്പോള്‍ വീട് അകത്തുനിന്നും പൂട്ടിയ നിലയില്‍ ആയിരുന്നു. വാതില്‍ ചവിട്ടി തുറന്ന് അകത്തു കയറി പരിശോധിച്ചപ്പോള്‍ കത്തിക്കരിഞ്ഞ നിലില്‍ രൂപാലിയേയും മകളേയും കണ്ടെത്തുകയായിരുന്നു. നിയന്ത്രണം വിട്ട അനില്‍ ബഹളംവെച്ച് വീട്ടില്‍ നിന്നും ഇറങ്ങിയോടി. നാട്ടുകാരാണ് പൊലീസില്‍ വിവരം അറിയിച്ചത്. രൂപാലിയുമായി കുടുംബ പ്രശ്‌നങ്ങള്‍ ഒന്നും ഉണ്ടായിരുന്നില്ലെന്നാണ് അനില്‍ പൊലീസിന് നല്‍കിയിരിക്കുന്ന മൊഴി. നാല് മാസം മുന്‍പാണ് അനിലും കുടുംബവും തൃശാലക്കുളത്ത് വാടകയ്ക്ക് താമസത്തിന് എത്തിയത്. കസബ പൊലീസ് അസ്വാഭിവ മരണത്തിനാണ് കേസ് എടുത്തിരിക്കുന്നത്‌