ബിആർഎസിന് തിരിച്ചടി നൽകിക്കൊണ്ട് പേദപ്പള്ളി ലോക്സഭാ മണ്ഡലത്തിലെ എംപി വീണ്ടും കോൺഗ്രസിൽ ചേർന്നു. ബി വെങ്കടേഷ് നേതയാണ് പാര്‍ട്ടി വിട്ട് കോണ്‍ഗ്രസ് അംഗത്വം സ്വീകരിച്ചത്. ന്യൂഡൽഹിയിൽ തെലങ്കാന മുഖ്യമന്ത്രി എ രേവന്ത് റെഡ്ഡിയുടെയും ഉപമുഖ്യമന്ത്രി എം ഭട്ടി വിക്രമാർക്കയുടെയും സാന്നിധ്യത്തിലാണ് വെങ്കടേഷ് കോൺഗ്രസിൽ ചേർന്നത്.
എഐസിസി ജനറൽ സെക്രട്ടറി കെ സി വേണുഗോപാൽ വെങ്കിടേഷിനെ സ്വാഗതം ചെയ്തു. 2019-ലെ പാർലമെൻ്റ് തിരഞ്ഞെടുപ്പിന് തൊട്ടുമുമ്പ് പേദപ്പള്ളി ലോക്സഭാ സീറ്റിൽ മത്സരിക്കാമെന്ന ഉറപ്പിൽ വെങ്കിടേഷ് കോൺഗ്രസ് വിട്ട് അന്നത്തെ തെലങ്കാന രാഷ്ട്ര സമിതിയിൽ ചേരുകയായിരുന്നു. അതനുസരിച്ച് തിരഞ്ഞെടുപ്പിൽ കോൺഗ്രസിലെ എ ചന്ദ്രശേഖറിനെ പരാജയപ്പെടുത്തി 95,180 വോട്ടുകളുടെ ഭൂരിപക്ഷത്തിൽ വിജയിക്കുകയും ചെയ്തിരുന്നു.