ന്യൂസിലാന്‍ഡിന് എതിരായ രണ്ടാം ഏകദിനത്തില്‍ സഞ്ജു സാംസനെ പുറത്തിരുത്തിയതില്‍ വലിയ വിമര്‍ശനങ്ങള്‍ സോഷ്യല്‍ മീഡിയയില്‍ ഉയര്‍ന്നിരുന്നു. ആദ്യ ഏകദിനത്തില്‍ മികച്ച പ്രകടനം കാഴ്ചവെച്ചിട്ടും സഞ്ജുവിനെ പുറത്തിരുത്തിയത് വലിയ വിവാദങ്ങള്‍ക്കും വഴിവച്ചിരുന്നു.
ഇതിനു പിന്നാലെ രണ്ടാം ഏകദിനത്തിനിടയിലെ ഒരു വീഡിയോയാണ് സോഷ്യല്‍ മീഡിയയില്‍ പ്രചരിക്കുന്നത്. മഴയ്ക്കിടെ പിച്ചില്‍ കവര്‍ മൂടാന്‍ എത്തിയ ഗ്രൗണ്ട് സ്റ്റാഫിനെ സഞ്ജു സഹായിക്കുന്നതാണ് വീഡിയോയില്‍ കാണുന്നത്. ഹാമില്‍ട്ടന്‍ സെടാന്‍ പാര്‍ക്ക് ഗ്രൗണ്ടില്‍ കനത്ത മഴയും കാറ്റും കാരണം ഗ്രൗണ്ട് സ്റ്റാഫ് പിച്ച് മൂടാന്‍ പ്രയാസപ്പെട്ടപ്പോഴാണ് സഞ്ജു ഓടിയെത്തിയത്.
ഐപിഎല്‍ ടീം രാജസ്ഥാന്‍ റോയല്‍സാണ് വീഡിയോ സോഷ്യല്‍ മീഡിയയില്‍ ഷെയര്‍ ചെയ്തിരിക്കുന്നത്. ഇതിന് താഴെ നിരവധി പേരാണ് സഞ്ജുവിന് സപ്പോര്‍ട്ടും ആശംസകളും അറിയിച്ച് രംഗത്തെത്തിയത്.