പത്താന്‍ സിനിമയിലെ ഗാന രംഗവുമായി ബന്ധപ്പെട്ട വിവാദങ്ങള്‍ക്ക് പിന്നാലെ കേന്ദ്ര മന്ത്രി സ്മൃതി ഇറാനിയുടെ പഴയ വീഡിയോ പുറത്തുവിട്ട് തൃണമൂല്‍ കോണ്‍ഗ്രസ് നേതാവ് റിജു ദത്ത.
സ്യൂട്ടില്‍ കാവി വസ്ത്രം ധരിച്ച് മിസ് ഇന്ത്യ മത്സരത്തില്‍ പങ്കെടുക്കുന്ന സ്മൃതി ഇറാനിയുടെ വീഡിയോയാണ് റിജു ദത്ത പങ്കുവെച്ചിരിക്കുന്നത്. ബിജെപി ഐടി മേധാവി അമിത് മാളവ്യയുടെ ട്വീറ്റിന് മറുപടിയായാണ് ഇദ്ദേഹം ഈ വീഡിയോ പങ്കുവെച്ചത്. ഇതോടെ ട്വിറ്ററില്‍ ബിജെപി-തൃണമൂല്‍ കോണ്‍ഗ്രസ് വലിയ പോരാണ് നടക്കുന്നത്.
പത്താന്‍ സിനിമയിലെ ഗാനരംഗം പുറത്തുവന്നതോടെയാണ് കാവി വസ്ത്രത്തെ ചൊല്ലിയുള്ള വിവാദങ്ങള്‍ക്ക് തുടക്കമിട്ടത്. ഗാനരംഗത്തില്‍ ദീപിക ധരിച്ചിരുന്ന അടിവസ്ത്രത്തിന്റെ കളറിനെ ചുറ്റിപ്പറ്റിയായിരുന്നു വിവാദം. ഹിന്ദുത്വത്തെ അപമാനിക്കാനുള്ള ബോധപൂര്‍വമായ ശ്രമമാണ് ഇത് എന്നായിരുന്നു ബിജെപി നേതാക്കളുടെ ആരോപണം.