ബിസ്‌ക്കറ്റിന്റെ മറവില്‍ ലോറിയില്‍ കടത്താന്‍ ശ്രമിച്ച നിരോധിത പുകയില ഉല്‍പ്പന്നങ്ങള്‍ പിടികൂടി എക്‌സൈസ് സംഘം. ശനിയാഴ്ച രാത്രി 10 മണിക്ക് എടപ്പാളിനടുത്ത് നിന്നും രണ്ട് ലോറികളില്‍ നിന്നായി 1.5 ലക്ഷത്തോളം പാക്കറ്റ് പുകയില ഉല്‍പ്പന്നങ്ങളാണ് പിടികൂടിയത്. പട്ടാമ്പി ഞാങ്ങാട്ടിരി കുരിപ്പറമ്പില്‍ രമേഷ് (44),വല്ലപ്പുഴ കാളപറമ്പില്‍ അലി (47 )തിരുവനന്തപുരം നെടുമങ്ങാട് ഇടിഞ്ഞാര്‍, കിഴക്കുംകര ഷമീര്‍ (38) എന്നിവരാണ് കസ്റ്റഡിയിലായത്.
വട്ടംകുളത്തെ ഗോഡൗണില്‍ നിരോധിത പുകയില ഉല്‍പ്പന്നങ്ങള്‍ ഇറക്കാന്‍ ശ്രമിക്കുന്നതിനിടെയാണ് എക്‌സൈസ് സംഘം പിടികൂടിയത്. വിപണിയില്‍ ഒരു കോടി രൂപയോളം വില മതിക്കുന്ന പുകയില ഉല്‍പ്പന്നങ്ങളാണ് കടത്താന്‍ ശ്രമിച്ചത്.