സാമ്പത്തിക പ്രതിസന്ധി ചൂണ്ടിക്കാട്ടി നിര്‍ധന കുടുംബങ്ങള്‍ക്ക് സര്‍ക്കാര്‍ നല്‍കിവരുന്ന സൗജന്യ ഓണക്കിറ്റ് വിതരണം മുടങ്ങി. അന്ത്യോദയ അന്നയോജന പദ്ധതിയിലുള്ളവര്‍ക്ക് സപ്ലൈകോ വഴി നല്‍കുന്ന ഓണക്കിറ്റാണ് ഇത്തവണ മുടങ്ങിയത്. സാമ്പത്തിക പ്രതിസന്ധിയുടെ പശ്ചാത്തലത്തില്‍ ധനവകുപ്പ് അംഗീകാരം നല്‍കാത്തതാണ് ഇതിനു കാരണം.

അതേസമയം വര്‍ഷങ്ങളായി പതിവുളള ഓണക്കിറ്റ് സാമ്പത്തിക ബാധ്യതയുടെ പേരില്‍ ഒഴിവാക്കുമ്പോഴും എല്ലാ എം.എല്‍.എമാര്‍ക്കുമായി 2000 രൂപയുടെ കിറ്റ് വിതരണം സപ്ലൈക്കോ നടത്തുന്നുണ്ട്. ഇക്കാര്യത്തില്‍ മാത്രം സാമ്പത്തിക ബാധ്യത ഒരു പ്രശ്‌നമേയല്ല. നല്ല നിലവാരമുളള സാധനങ്ങള്‍ എം.എല്‍ എ മാര്‍ക്ക് നേരിട്ട് എത്തിച്ചു നല്‍കാനാണ് നിര്‍ദ്ദേശം.

സാധാരണക്കാര്‍ ആശ്രയിക്കുന്ന സപ്ലൈക്കോ സ്‌റ്റോറുകളില്‍ ഓണത്തിന് വിതരണത്തിനെത്തിച്ച സാധനങ്ങള്‍ക്ക് ഗുണനിലവാരമില്ലെന്ന ആക്ഷേപം ഉയരുന്ന സാഹചര്യത്തില്‍ തന്നെയാണ് എം.എല്‍.എമാര്‍ക്ക് ഗുണനിലാവാരം ഉളളവ നല്‍കണമെന്ന നിര്‍ദ്ദേശമെന്നത് ശ്രദ്ധേയമാണ്.

എല്ലാ വര്‍ഷവും ഓണക്കാലത്ത് നിര്‍ധന കുടുംബങ്ങള്‍ക്ക് സര്‍ക്കാര്‍ സപ്ലൈകോ വഴി ഓണക്കിറ്റ് നല്‍കിയിരുന്നു. അരി, പഞ്ചസാര, പയര്‍, കടല, മുളക് തുടങ്ങി ഓണസദ്യ ഒരുക്കാനാവശ്യമായ എല്ലാ സാധനങ്ങളും ഈ കിറ്റില്‍ ഉള്‍പ്പെടുത്തിയിട്ടുണ്ട്. ബിപിഎല്‍ വിഭാഗത്തില്‍ തന്നെ സാമ്പത്തികമായി ഏറെ പിന്നോക്കം നില്‍ക്കുന്ന അന്ത്യോദയ അന്നയോജന വിഭാഗത്തില്‍പ്പെട്ടവര്‍ക്കാണ് ഇതു നല്‍കിവന്നിരുന്നത്.
അഞ്ചു ലക്ഷത്തോളം കുടുംബങ്ങളാണ് സര്‍ക്കാരിന്റെ ഓണക്കിറ്റിനായി കാത്തിരിക്കുന്നത്. ഇതു സംബന്ധിച്ച് അറിയിപ്പ് ഒന്നും നല്‍കാത്തതിനാല്‍ സപ്ലൈകോ ഔട്ട്‌ലെറ്റലിലെത്തി മണിക്കൂറുകളോളം കാത്തു നിന്ന് നിരാശരായി മടങ്ങേണ്ട ഗതികേടിലാണിവര്‍.

സാമ്പത്തിക പ്രതിസന്ധിയുടെ പേരില്‍ ധനകാര്യ വകുപ്പാണ് ഓണക്കിറ്റ് പദ്ധതിക്ക് അംഗീകാരം നിഷേധിച്ചത്. സപ്ലൈകോ വഴി കിറ്റ് നല്‍കുകയും ഇതിന്റെ തുക സിവില്‍ സപ്ലൈസ് കോര്‍പ്പറേഷന് സര്‍ക്കാര്‍ നല്‍കുകയുമാണ് ചെയ്തിരുന്നത്. സര്‍ക്കാര്‍ അനുമതിയില്ലാത്തതിനാല്‍ സപ്ലൈകോ പദ്ധതി നടത്താന്‍ തയാറായതുമില്ല.
പ്രളയത്തിന്റെ പശ്ചാത്തലത്തില്‍ ഓണാഘോഷത്തിന്റെ ചെലവ് ചുരുക്കിയെങ്കിലും കോടികളാണ് ആഘോഷ പരിപാടികള്‍ക്കായി സര്‍ക്കാര്‍ ചെലവഴിക്കുന്നത്. ഇതിനിടയിലാണ് സമൂഹത്തിലെ ഏറ്റവും പിന്നോക്കം നില്‍ക്കുന്ന വിഭാഗത്തിലുള്ളവര്‍ക്ക് സാമ്പത്തിക പ്രതിസന്ധിയുടെ പേരില്‍ ആനുകൂല്യം നിര്‍ത്തലാക്കുന്നത്. സംഭവത്തില്‍ പ്രതിപക്ഷ നേതാവ് രമേശ് ചെന്നിത്തല പ്രതിഷേധം ഉയര്‍ത്തി.