ചെന്നൈ: കേരളത്തില്‍ നിന്നു തമിഴ്‌നാട്ടിലേക്കു വരുന്നവരെ പരിശോധിക്കാന്‍ നേരിട്ടിറങ്ങി മന്ത്രിമാര്‍. ആരോഗ്യമന്ത്രി എം.സുബ്രഹ്മണ്യം, ദേവസ്വം മന്ത്രി പി.കെ.ശേഖര്‍ ബാബു എന്നിവരുടെ നേതൃത്വത്തിലാണ് ചെന്നൈ സെന്‍ട്രല്‍ സ്‌റ്റേഷനില്‍ പരിശോധന. ആലപ്പി എക്‌സ്പ്രസില്‍ എത്തുന്ന കേരളത്തില്‍ നിന്നുള്ള യാത്രക്കാരെയാണ് പരിശോധിക്കുന്നത്.
ആര്‍ടിപിസിആര്‍ നെഗറ്റീവ് സര്‍ട്ടിഫിക്കറ്റോ, രണ്ട് ഡോസ് വാക്‌സിനെടുത്ത സര്‍ട്ടിഫിക്കറ്റോ ഉള്ളവരെ മാത്രമേ തമിഴ്‌നാട്ടിലേക്ക് പ്രവേശിപ്പിക്കൂ. കേരളത്തില്‍നിന്ന് വരുന്നവര്‍ക്ക് പരിശോധന തുടരുമെന്ന് ആരോഗ്യമന്ത്രി വ്യക്തമാക്കി.
കേരളത്തില്‍ നിന്നുള്ളവര്‍ക്ക് കര്‍ശന നിയന്ത്രണം ഏര്‍പ്പെടുത്തുമെന്ന് തമിഴ്‌നാട് സര്‍ക്കാര്‍ വ്യക്തമാക്കിയിരുന്നു. കേരളത്തില്‍ രോഗികളുടെ എണ്ണത്തില്‍ കുറവ് വരാത്ത സാഹചര്യത്തിലാണ് സംസ്ഥാനത്തു നിന്നുള്ള യാത്രക്കാര്‍ക്ക് കര്‍ണാടകയും തമിഴ്‌നാടും നിയന്ത്രണം ഏര്‍പ്പെടുത്തിയത്.